एमालेय् जनजाति दुजःतय् ल्याः
नकतिनि क्वचाःगु (नेकपा -एमाले)या महाधिवेशनं जनजाति, मधेशी, दलित आदि समुदाययात कोटा प्रणालीपाखें केन्द्रीय समितिइ त्याका हःगुलिं थुगुसी उमिगु ल्याः न्हापा स्वयां अप्वःगु दु । थुगुसी एमालेया केन्द्रय् जनजाति, दलित, मुस्मां, लिउने लानाच्वंगु वर्ग आदिया ल्याः करिब ४५ प्रतिशत ति थ्यनाच्वंगु दु ।कोटा प्रणालीं थुगुसी जनजाति-यात १३, मधेशीयात ११, मिसायात १५, दलितयात ६, मुस्मांयात २ व लिउने लानाच्वंगु वर्गयात २ सीट आरक्षणया व्यवस्था याःगु खः । अन्तरिम संविधानं समानुपातिक समावेशीया सिद्धान्तयात नाला काःगुलिं वहे अनुरुप एमालें नं थीथी समुदायया लागिं आरक्षणया नीति नालाः थ्व वर्गयात केन्द्रय् समावेश याकूगु खः ।
आरक्षण व खुल्ला प्रतिस्पर्धापाखें एमालेया केन्द्रय् नेवाःत धाःसा मुक्कं च्याम्ह थ्यंगु दु । केन्द्रय् साहना प्रधान, अष्टलक्ष्मी शाक्य, राजेन्द्र श्रेष्ठ, कृष्णगोपाल श्रेष्ठ, रविन्द्र श्रेष्ठ, विनोद श्रेष्ठ, जीवनराम श्रेष्ठ व गंगालाल तुलाधरपिं त्याना वःगु खः । डा. मंगलसिद्धि मानन्धरयात केन्द्रीय दुजः सरहया मान्यता दइगु केन्द्रीय अनुशासन समितिया दुजः दयेकूगु दु ।
एमालेपाखें जनजातियात आरक्षण बिउसां थ्व आरक्षणया कोटां जनजाति आन्दोलनय् गबलें सहयोग मयाइपिं व अझ जिउथाय् तक थ्व आन्दोलनयात हे विरोध याइपिं मनू-तय्त तकं ल्ययाहःगु खनाः धाःसा आरक्षणया दुरुपयोग जूगु द्वपं अन दुनेया जनजाति आन्दोलनकारीतय्सं बियाहःगु दु ।
