स्वलाया दुने तराईया जंगल साफ
येँ (सन्ध्या टाइम्स)/सरकार व राजनीतिक पार्टीत सत्ताया ल्वापुइ तक्यनाच्वंगु इलय् लाक्क उखे तराई लागाय् धाःसा न्हापा लिपा गबलें मजूनि कथं जंगल सखाप यायेगु ज्या तीव्र रुपं न्ह्यानाच्वंगु दु। द्वलंद्वः हेक्टर जंगलय् पिनातःगु सिमा पालाः यंकु यंकुं आः सःबसः हेक्टर जक ल्यं दनिगु खँ स्थानीय मनूतय्सं धाःगु दु ।
तराईया सप्तरी, सिराहा, पर्सा, धनुषा आदि जिल्लाय् न्यनाच्वंगु जंगलं सुनां मसीक सिमा पालाः यंकातःगु खः। तर थ्व याःपिं सु धकाः सुनां नं मसिउ। उकुन्हु छक्वः प्रहरी परिचालन याःबलय् थनं जक ५४ करोड तका बराबरया सिँ प्रहरीं ज्वंगु खः ।
स्थानीय जनतां धाः कथं जंगलयात पूरा हे मरुभूमि दयेकेगु थ्व ज्या मुक्कं स्वलाया दुने जूगु खः। उगु वन जंगल लागा सुरक्षाया लागिं धकाः अन स्थानीय मनूत तकं दुकायेगु यानातःगु मदु। स्थानीय मनूतय्त सिन्का छपु तकं काये मदु धकाः पनातःगु जंगल लागां थथे अर्बौं तकाया सिमा पालाः यंकलं नं सुनां नं मपंगु खनाः धाःसा मनूत अजू चायाच्वंगु दु।
वन सुरक्षाया लागिं तयातःपिं कर्मचारीतय्सं धाःसा सरकारं थःपिंत बन्दूक छपु तकं तये मदु यानातःगु कारणं थ्व समस्या जूगु खँ धयाच्वंगु दु। थःपिंके ज्वनेगु लागिं माःगु ल्वाभः मदुगु व छुं जुयाः ज्वँ हे ज्वंसां वयात कारवाही यायेगु अधिकार धाःसा थःपिंत मदुगु कारणं यानाः थ्व समस्या ज्यंके मफयाच्वगु खँ प्रहरीं धायेगु याः ।
