चिकित्सकत आन्दोलीत / आइतवाः देय्न्यकंया अस्पताल बन्द
मंगलवाः बहनी बेपत्ता जुयादीम्ह चितवन भरतपुरया बीपी कोइराला मेमोरियल क्यान्सर अस्पतालया कार्यकारी निर्देशक डा. झत्तमान श्रेष्ठयात अज्ञात पुचलं अपहरण याःगु विरुद्ध चिकित्सकतय्सं बिहीवाः प्रदर्शन याःगु दु । चिकित्सक व पेशाकर्मीतय्सं श्रेष्ठया सकुसल रिहाईया माग यासें बिहीवाः भरतपुरय् प्रदर्शन याःगु खः ।
भरतपुर २४ कोठी पाखें पिहांवःगु जुलुस जिल्ला प्रशासन ज्याकूथी थ्यंका: अन धर्नाय् हिउगु खः । धर्नाय् नेपाल चिकित्स संघया केन्द्रीय महासचिव डा. अञ्जनीकुमार झां थौं बहनी तक सरकारं श्रेष्ठया अवस्था सार्वजनिक मयासाः चिकित्सकत सतकय् कुहांवयाः देय्न्यंकया स्वास्थ्य सेवा ठप्प यायेगु ख्याच्वः बियादिल ।
निन्हु लिपा नं श्रेष्ठया अवस्था अज्ञातय् जूगु व बुधवाः बहनी श्रेष्ठया बा. ३. च. ९८९ नम्बरया गाडी पोखराया कुडार चोकय् बेवारिसे अवस्थाय् लुइकेवं प्रहरीं श्रेष्ठया अपहरण जूगु निष्कर्ष पिकागु दु ।
उखे बिहीवाः येँय् नेपाल चिकित्सक संघया आकस्मिक भेला च्वनाः श्रेष्ठयात अपहरण याःगु विरोधय् आइतवाः देय्न्यंकया अस्पताल, स्वास्थ्य संस्था, स्वास्थ्य चौकी व उपचौकी बन्द यायेगु निर्णय याःगु दु । नापं संघं शुक्रवाः सुथय् प्रधानमन्त्रीयात ज्ञापनपत्र लःल्हाइगु जूगु दु ।
