'पार्टीं तयार याःगु संविधानया मस्यौदा जक घोषणा'
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' जेठ १५ गते माओवादीं संविधान घोषणा याइगु मखसें पार्टीं तयार याःगु संविधानया मस्यौदा जक घोषणा यायेत्यनाःगु खँ धयादीगु दु । वय्कलं धयादिल, 'पार्टीं तयार याःगु संविधानया मस्यौदा जनता समक्ष घोषणा यायेत्यनाःगु खः ।'
शुक्रवाः निसें सुरु जुइगु पार्टीया केन्द्रीय कमिटीया बैठकया एजेण्डा तयार यायेत धौख्यःया होटेलय् दीम्ह प्रचण्डं बिहीवाः पत्रकारत नाप खँल्हाबंला यानादिसें माओवादीं सतकं संविधान घोषणा यायेत्यंगु धकाः गलत प्रचार जुयाच्वंगु धयादिसें प्रचार जूकथं संविधान घोषणा यायेमत्यनाःगु स्पष्ट यानादिल ।
वय्कलं राष्ट्रिय सहमति बिना संविधानसभाया म्याद थप जुइमफइगु धयादिल । जेठ १४ गते लिपा नं सहमति जुसाः म्याद थप याना: संविधानसभा सकृया जुइगु धयादिसें दलतय् सहमतिलय् संविधानसभायात गति बीमाःगु धयादिल ।
सत्तापक्षया कारणं सहमति जुइमफुगु धयादिसें प्रचण्डं सरकार पक्षं लचकता क्यंसाः सहमति जुइगु दावी यानादिल । वय्कलं माओवादी लडाकुया समायोजन व व्यवस्थापनया खँय् दलत दथुइ सहमति जुइ थाकुयाच्वंगु धयादिसें आः हे समायोजन यायेगु लडाकुया ल्याः क्वःछिमफइगु धयादिल ।
प्रचाण्ड थः जहान सीता, काय् प्रकाश व पोलिटब्यूरो दुजः अग्नी साप्कोटा सहित बुधवाः धौख्यः थ्यंकादीगु खः । वय्कपिं बिहीवाः न्हिनय् येँय् लिहांवंगु दु ।
