जेठ १४ लिपा दक्वं सुरक्षा निकाय परिचालन याइगु
राष्ट्रिय सुरक्षा परिषदं जेठ १४ लिपा संविधानसभाया म्याद थपे मजुसाः ब्वलनेफइगु अवस्थायात ध्यानय् तयाः नेपाली सेना लगायत दक्वं सुरक्षा निकाययात प्रभावकारी रुपय् परिचालन यायेगु निर्णय याःगु दु ।
बिहीवाः नेपाली सेना, सशस्त्र प्रहरी, नेपाल प्रहरी व राष्ट्रिय अनुसन्धान विभागया प्रमुख सहित च्वंगु सुरक्षा परिषदया बैठकं जेठ १४ लिपा ब्वलनेफइगु परिस्थितिया निंतिं तयार जुइत निर्देशन ब्यूगु खः । बैठक लिपा रक्षामन्त्री विद्यादेवी भण्डारीं जेठ १४ लिपा ब्वलनीनेफइगु अवस्थाया निंतिं सरकार तयार जूगु कनादिल ।
वय्कलं यदि प्रमुख प्रतिपक्षया कराणं म्याद थपे मजुइगु अवस्था वसाः सरकार अज्याःगु परिस्थितियात निण्न्त्रणय् कायेत तयार जूगु कनादिसें वयां लिपा न्हूगु संविधान गुकथं जारी यायेगु बारे सरकारं राजनीतिक निर्णय याइगु कनादिल ।
उपप्रधानमन्त्री विजयकुमार गच्छदारं माओवादीं सत्ता कब्जा यायेगु राणनीति दयेकाः च्वंगुलिं उकीयात विफल यायेत सरकार सजग जूगु धयादिल । बैठकं बैशाख १८ गते सत्ता कब्जा यायेगु माओवादी रणनीतिकयात विफल याःगुलिं सुरक्षा निकाययात प्रशंसा नं याःगु खः ।
बैठकय् जेठ १४ लिपाया अवस्था हिसांत्मक जुइफुगु धासें उकीया बारे सहलह जूगु खः । नापं बैठकं संविधानसभाया म्याद थप मजूगु अवस्थाय् संकटकाल लागु यायेगु अवस्था मदुगु निष्कर्ष पिकागु दु । अथेहे जेठ १५ गते माओवादीं घोषणा यायेत्यंगु जनसंविधान शान्ति सम्झौता विपरित जूगु निष्कर्ष नं पिकागु दु ।
बैठकय् प्रधानमन्त्रीम माधवकुमार नेपाल, उपप्रधानमन्त्री विजयकुमार गच्छदार, रक्षामन्त्री विद्यादेवी भण्डारी, गृहमन्त्री भीम रावल लगायत मन्त्रीत व सुरक्षा प्रमखुतय् उपस्थिति दुगु खः ।
