झिगू दलया मोर्चाय् फोरम मच्वनीगु
शान्ति व संविधान लगायत जनआन्दोलनया उपलब्धित रक्षा यायेगु निंतिं सरकारया राजीनामा फ्वंगु झिगू दलया मोर्चा पाखें मधेशी जनअधिकार फोरम अलग च्वनीगु जूगु दु ।
फारेमं माओवादीं जेठ १५ गते घोषणा यायेत्यंगु जनसंविधान प्रति असहमती प्वकूसें संविधानसभाया म्याद थपया निंतिं वर्तमान सरकारं राजीनामा बीमाःगु माओवादी र्सत अराजनीतिक व गैरजिम्मेवार जूगु धासें अलग च्वनेगु निर्णय याःगु खः ।
सिंहदरवारय् बुधवाः च्वंगु फोरमया संसदीय दलया बैठक लिपा पार्टी सहअध्यक्ष जयप्रकाशप्रसाद गुप्तां सरकारया नेतृत्व परिवर्तन मजुसाः संविधानसभाया म्याद थप मयायेगु माओवादीया अभिव्यक्ति अराजनीतिक व गैरजिम्मेवार जूगु कनादिल ।
नीन्याम्ह सभासद् दुगु फोरमया संसदीय दलया अनौपचारिक बैठकय् बुधवाः झिम्ह जक सभासद्तय् ब्वति दुगु खः । फोरम अध्यक्ष सहित झिंन्याम्ह सभासद्त पार्टीया ज्यां येँ नं पिने जूगुलिं बैठकय् ब्वति मकागु खँ धाःगु दु ।
