आत्मालोचना यानाः सहमति यायेत आयोगया इनाप
राष्ट्रिय मानवअधिकार आयोगं संविधान विघटनया संघारय् थ्यंगु दुर्भाग्यपूर्ण जूगु धासें राजनीतिक दलतय्त आत्मलोचना यानाः सहमतिलय् वनेत इनाप याःगु दु ।
राष्ट्रिय मानव अधिकार आयोगया अध्यक्ष केदारनाथ उपाध्यायं बुधवाः छगू विज्ञप्ती पिथनादिसें पर्याप्त ई दुसां नं शान्ति व संविधान निर्माणया निंतिं कर्तव्यनिष्ठ जुयाः ज्या यायेमाःगु ऐतिहासिक संविधनसभा झण्डै विघटनया संघारय् थ्यंगु खँ नेपाः राष्ट्र व दक्वं जनताया निंतिं दुर्भाग्यया खँ जूगु खँ न्ह्यथंनादीगु दु ।
राजनीतिक दलतय्सं राष्ट्र व जनता समक्षा याःगु बचनबद्धताया थ्वस्वयां अप्व उल्लंघन व जनादेशया उपहास व अनादर छुं जुइमफइगु खँ न्ह्यथंसे विज्ञप्तीइ थुकीया निंतिं नेपाःया प्रमुख राजनीतिक दलतय्सं जनता समक्षा क्षमाप्रार्थी जुइमाःगु ई वःगु खँ धयातःगु दु ।
विज्ञप्तीइ संविधानसभा पाखें हे संघीय लोकतान्त्रिक गणतन्त्र नेपालया संविधाना घोषणा यायेमाःगु खँय् बः बियातःगु दु । आः या इलय् राजनीतिक दलत दथुइ आम सहमतिपाखें विवादया विषयत ज्यंकेगु व राष्ट्रिय सहमतिया सरकार गठनय् अग्रसर जुइमाःगु खँ धयातःगु दु ।
आयोगं राष्ट्र व जनताया आकांक्षाय् खेलबाड मयासें इतिहासं ब्यूगु कार्यभारयात पूवंकेत राजनीतिक दलतय्त इनाप याःगु दु ।
