ल्वाभः दुगु पार्टी नाप सम्झौता जुइमखु : गच्छदार
उपप्रधान नापं भौतिक योजना मन्त्री विजयकुमार गच्छदारं ल्वाभः दुगु पार्टी नाप सम्झौता जुइमफइगु खँ धयादीगु दु । वय्कलं ल्वाभः त्वःता नागरिक पार्टी जुयाः वःसा सरकारया नेतृत्व माओवादीयात बीत थःगु दल तयार जूगु धयादिल ।
वय्कलं माओवादीया वाइसीएल विघटन, स्वीन्यद्वः लडाकुतय्त जक क्यान्टोनमेन्टय् तयाः मेपिंत निशस्त्र यायेगु व छेँबुँ लितबीमाःगु धयादिसें गच्छदारं अथे याःसा थःम्हं माओवादीयात सरकार नेतृत्वया निंतिं प्रस्ताव यायेगु धयादिल ।
नेपाल टेमिकम कर्मचारी युनियनया न्हापांगु केन्द्रीय बैठकया विराटनगरय् उल्लेज्या यानादिसें वय्कलं जेठ १४ जते तक नं राजनीतिक निकास पिहांमवसाः प्रमुख स्वंगू दलयात सरकारया नेतृत्व यायेगु नैतिक आधार मदइगु धयादिल । वय्कलं माओवादी, कांग्रेस व एमालेया कारणं हे राजनीतिक समस्या समाधान जुइ थाकूगु धयादिसें आः थुकीयात निकास बीत चीचीधंगु दल अग्रसर जुइमाःगु धयादिल ।
अथेहे वय्कलं जेठ १४ गते दुने न्हूगु संविधान जारी जुइमफइगुलिं राजनीतिक दलतय्सं जनता समक्ष माफी फ्वनेमाःगु धयादिल । वय्कलं माओवादी, कांग्रेस व एमालें माफी फ्वनेधुंकाः थःम्हं नं माफी फ्वनेगु धयादिल ।
