नेवाः न्ह्यलुवाःत कोइरालाया छेँय् धर्ना
येँ (सन्ध्या टाइम्स)/नेवाः स्वायत्त राज्य मंकाः संघर्ष समितिं संविधानसभाया स्वंगू तःधंगु दलया शीर्ष नेतातय्त राष्ट्रिय सहमतिया नितिं दवाव बीगु ताः तयाः न्ह्याकूगु ज्याझ्वः कथं थौं नेपाली कांग्रेसया कार्यावाहक सभापति सुशिल कोइरालाया निवास महाराजगन्जय् वनाः धर्ना बीगु ज्या यात ।
धर्ना ज्याझ्वलय् कांग्रेसया नेता कोइरालायात नेवाः स्वायत्त राज्य मंकाः संघर्ष समितिया नायः नरेशवीर शाक्यं ज्ञापनपौ लःल्हानादीगु खः। ज्ञापनपौ लःल्हाना कयादिसें नेता कोइरालां संघर्ष समितिं तःगु खँ थम्हं पार्टीया केन्द्रीय कमिटीया मुँज्याय् यंकाः सहलह ब्याकेगु बचं बियादीगु खः।
वय्कलं आःया अवस्थाय् देशय् दकलय् तःधंगु चिउताः धइगु हे स्थायी शान्ति खः धइगु बिचाः प्वंकुसें शान्ति वहाली याये मफुत धाःसा न्ह्याथे याःसां देय्या समस्या समाधान जुइ मखु धयादिल। र्थौं सुथय् ७:४५ निसें ८:४५ बजे तक कोइराला निवासय् नेवाः कार्यकर्तातय्सं धर्ना बिउगु खः। धर्नाय् नेवाः स्वायत्त राज्य मंकाः संघर्ष समितिया दुजःपिं, नेवाः न्ह्यलुवाःपिं नापं थीथी जातीय खलः पुचःया प्रतिनिधितय्सं ब्वति कयादीगु खः ।
धर्ना ज्याझ्वलय् नेपाः राष्ट्रिय पार्टीया नायः डा. केशवमान शाक्य, सभासद् दिलीप महर्जन, बुद्ध साय्मि, विरेन्द्रभक्त श्रेष्ठ, सुजिव बज्राचार्यपिंसं न्ववानादीगु खः ।
नेवाः स्वायत्त राज्य मंकाः संघर्ष समितिं संविधानसभायात रक्षा, राष्ट्रिय सहमति, संघीय लोकतान्त्रिक गणतन्त्रया सुनिश्चितता, धर्म निरपेक्ष राज्ययात संस्थागत, नेवाः स्वायत्त राज्यया सुनिश्चितता जुइमाः धइगु माग यासें थ्व धर्ना च्वंगु खः ।
अथे हे कन्हय् सुथय् ७:३० बजे निसें एकिकृत माओवादीया अध्यक्ष प्रचण्डया निवासय् व कंस एमालेया अध्यक्ष झलनाथ खनालया निवासय् धर्ना च्वनेगु ज्याझ्वः दयेकूगु दु। नापं आः वइगु शनिवाः सुथय् येँनिसें यलय् तक जुलुस पिकायेगु ज्याझ्वः नं घोषणा याना तयेधुंकूगु दु ।
