निर्देशक अपहरणया विरोधय् अस्पताल बन्द
येँ (सन्ध्या टाइम्स)/वीपी कोइराला मेमोरियल क्यान्सर अस्पताल भरतपुरया कार्यकारी निर्देशक डा. भक्तमान श्रेष्ठयात म्हमसिउपिं मनूतय्सं वंगु चान्हय् अपहरण याःगु दु। अस्पतालय् ज्या क्वचायेकाः चितवनया भरतपुर चौबीसकोठी लागाया थःगु छेँय् वनाच्वंगु इलय् वय्कःयात अपहरण याःगु खः। थौं सुथय् तकं वय्कः सम्पर्कय् मवःनिगु खँ छेँजःपिंसं धाःगु दु। वय्कलं गइगु बा. ३ च ९८९ नम्बरया गाडी नं तनाच्वंगु दनि। म्हिगः बहनी साढे ८ बजे वय्कलं थः जहान सीलु श्रेष्ठयात टेलिफोनय् अन्तिम स्वापू तयादीगु खः ।
थ्व हे झ्वलय् अस्पताल निर्देशक श्रेष्ठ अपहरण जूगु घटनाया विरोधय् थौं सुथंनिसें उगु अस्पताल बन्द याःगु दु। अनया कर्मचारीतय्सं आकस्मिक सेवा व वासः पसः बाहेक फुक्कं ज्या बन्द याना तःगु दु। थुकिं यानाः जाँचे याकः वयाच्वंपिं विरामीत मर्काय् लानाच्वंगु दु। निजी अस्पताल समन्वय समितिं थौं सुथय् हे पत्रकार सम्मेलन यानाः अपहरण जूम्ह क्यान्सर अस्पतालया निर्देशक श्रेष्ठयात तत्काल सार्वजनिक यायेत माग याःगु दु। थ्व हे झ्वलय् थौं सुथय् चितवनय् उच्च स्तरीय सुरक्षा समितिया मुँज्या नं च्वंगु दु ।
