अग्नि पीडितयात ग्वाहालिया इनाप
येँ (सन्ध्या टाइम्स)/ताहाननी अग्नीपीडित राहत संकलन समितिं थनया इतुंबहालय् छगू सार्वजनिक अन्तर्क्रिया ज्याझ्वः यासें वंगु वैशाखय् छक्वलं न्याखा छेँ मिं नयाः पीडित जूपिंत ग्वाहालिया लागिं आर्थिक संकलन यात ।
समितिया नायः चन्द्रानन्द नेवाःया सभापतित्वय् जूगु उगु ज्याझ्वलय् वंगु बैशाख ३ गते ताहाननीइ छेँ मिं नयाः स्थानीय नेवाःतय्गु न्याखा छेँ ध्वस्त जूगुलिं नेवाः नुगः ब्वयाः ग्वाहालि यायेत समितिया दुजः व सल्लाहकारतय्सं सकसितं इनाप यानादीगु खः ।
उगु ज्याझ्वलय् किलाघः त्वाः पुचःपाखें ७५ द्वः, न्यू जेनिथ स्कूलपाखें २४ द्वः व चाःचू अथेहे विप्लवी पुस्तकालयपाखें १० द्वः तका ग्वाहालि यायेगु बचं बिउगु खःसा स्थानीय जनसमुदायपाखें यानाः थ्यंमथ्यं १ लख ८० द्वः तका दां म्हयेफुगु खः ।
ज्याझ्वलय् समितिया सचिव बाबुराजा महर्जनं लसकुस यानादीगु खःसा राहत कोषं मुंगु दांया ल्याःचाः दांभरिंमचाराजा महर्जनं न्ह्यब्वयादीगु खः। ज्याझ्वलय् समितिया सल्लाहकार ज्यापु महागुथि येँ महानगर समितिया नायः मोहनकृष्ण डंगोल, नेवाः जागरण मञ्चया संयोजक सुजीव वज्राचार्य, नेवाः मुक्ति मोर्चा येँ जिल्लाया नायः उमेश स्थापितपिसं न्ववानादीगु खः ।
उगु अग्नी काण्डय् लानाः दँय्दसं जात्रा यायेत माःपिं द्यःत व बाजं ज्वलं नापं मिं नःगु खः। छेँ नयाः घरवार विहिन जूपिं स्थानीय मनूत आः पाल ग्वयाः च्वनाच्वंगु खः ।
