ग्यासय् भ्याट छूट यायेत इनाप
येँ (सन्ध्या टाइम्स)/सरकारं ग्यासय् कया वयाच्वंगु मूल्य अभिवृद्धि कर (भ्याट) छूट यायेत उपभोक्तातय्पाखें राष्ट्रिय उपभोक्ता मञ्चं अर्थ मन्त्रालययात इनाप याःगु दु ।
सरकारं ग्यासय् कया वयाच्वंगु करं आम उपभोक्ता जक समस्याय् लानाच्वंगु धासें भ्याट छूटया निंतिं इनाप याःगु खः। मन्त्रालययात छूटया निंतिं बिउगु पतिइ वाणिज्य तथा आपुर्ति मन्त्रालय, वाणिज्य विभाग व नेपाल आयल निगमयात नं बोधार्थ बिउग दु। उगु पतिइ सरकारं लागू यानातःगु भ्याटं आम उपभोक्ता बाहेकं उद्योगी व व्यापारीयात थुकिं छुं हे लिच्वः मलाःगु नं न्ह्यथना तःगु दु। सरकारं प्रति ग्यास सिलिण्डरय् झण्डै सत्या बराबर भ्याट कया वयाच्वंगु दु ।
थ्व स्वयां करीब खुला न्हयः नं नेपाल आयल निगमं ग्यासय् कया वयाच्वंगु भ्याट छूट यायेत इनाप यासे पौ छ्वःगु खःसां मन्त्रालयपाखें छुं नं निर्णय मयाःगु मन्त्रालयया छम्ह उच्च अधिकारीं धाःगु दु। उम्ह अधिकारीं भ्याट छूटया निंतिं आपालं इनाप वयेवं उकिया राजस्व परामर्श समितिइ छ्वये धुंगु व अनं वःगु सुझावयात हे दुथ्याकाः थ्व बारे आः वइगु आर्थिक दँया बजेटय् नं दुथ्याकेगु जानकारी बियादीगु दु ।
