नारायणहिटी दरवार जुल संग्रहालय

दशकौ निसें राजा महाराजातय्गु जक पहुँच दुगु नारायणहिटी दरवार संग्रहालय जुइवं आः सर्वसाधारणं नं स्वयेगु व चाःहिले दइगु जूगु दु । फागुण १६ गते सुथय् साढे १० बजे निसें ५ बजे तक नारायणहिटी दरवार सर्वसाधारणया निितं खुला जूगु दु । आ सर्वसाधारण उगु थासय् दुहाँवनेगु जक मखु चाःहिलेगु व अनया हरेक वस्तु बांलाक स्वयेदइगु तकं जूगु दु ।

दरबार संग्रहालय दुहाँवनेत ब्वनामितय्सं नीतका सर्वसाधारणं सच्छि तका चीन नापंया सार्क देय्या नागरिकतय्सं निसः व न्यय्तका अथेहे स्वंगूगु देय्या नागरिकतय्सं न्यासः तकाया टिकट कायेमाःगु ब्यवस्था याःगु दु । नारायणहिटी दरबार संग्रहालय फुक्कसिया निितं खुल्ला यायेवं सर्वसाधारण नं लय्ताःगु दु । पुलांम्ह जुजुया मूल दरबारया गौरीशंकर ध्वाखां दुहाँवना अन्नपूर्ण ध्वाखां पिहाँवयेवं संग्रहालयया भ्रमण क्वचाई ।

न्हापांगु चरणया जक ज्या क्वचागुिलं श्रीपेज व राजदण्ड धाःसा सर्वसाधारणं स्वयेत निषेध यानातःगु दु । राजदरबार संग्रहालय चाःहिलेत निघौ बिई । नरायणहिटी दरबारया फुक्क क्षेत्रय् थ्यंके मपुूसां जुजुया नीजि सचिवालय दुनेया लू फोहोरा बगंैचाया आकर्षक लू धाःसा स्वयेफइ । पुलांम्ह जुज खलःया दुजःतय्गु मंकाः स्यायेगु ज्या जूगु त्रिभुवन सद्नया निरीक्षण क्वचायेका अन्नपूर्ण ध्व्ााखां पिहाँवयेवं फोहोरा बगैंचाया निरीक्षण याकी । फोहरा बगैंचाय् तयातःगु फोहरा धाथें हे आकर्षक खनेदु । श्रीपेच आकारय् पिहाँवइगु लःया फोहरां न्ह्याम्हं मन्त्रमुग्ध जुइ । फोहरा बगैंचानापं च्वंगु खाःया छेँ नं उतिकं हे स्वयेबह जू । थ्वहे खाया छेँ च्वनाः पुलांिपं जुजुं मेपिनिगु खँ न्यनेगु याई । दरवार संग्रलय दुने पहाडं कुहाँवइगु झरना थेंया कृत्रिम झरना नं उतिकं हे आकर्षक खनेदु ।

प्रधानमन्त्री पुष्पकमल दाहालं फागुन १५ गते नारायणहिटी दरवार संग्रहालयया उलेज्या यानादिल । जेठ १५ गते च्वंगु संविधानसभाया न्हापांगु मुँज्यां नारायणहिटी दरबारयात संग्रहालय दयेकेगु घोषणा याःगु दु । संविधानसभाया न्हापांगु मुँज्यां पुलांम्ह जुजुयात नारायणहिटी दरबारं चीका प्यला दुने संग्रहालय दयेकेत सरकारयात निर्देश याःगु खः । जनताया बलं नारायणहिटी दरबारयात संग्रहालय दयेका जनताया निितं खुल्ला याःगु धैगु हे आः नारायणहिटी पूर्ण रुपं जनताया सम्पति जूगु दु ।