'न्हापा समायोजन यायेगु लडाकुया ल्याः निर्धारण'
नेपाली कांग्रेसं सुरक्षा निकायलय् समायोजन यायेगु माओवादी लडाकुया ल्याः निर्धारण लिपा जक समायोजन प्रकृया न्ह्याकेफइगु खँ धाःगु दु ।
बुधवाः कांग्रेस कार्यवहाक सभापति सुशील कोइरालाया महाराजगंजय् च्वंगु छेँय् जूगु पदाधीकारीतय् बैठकं माओवादीयात समायोजन यायेगु लडाकुतय् ल्याः निर्धारण यायेत इनाप याःगु दु । बैठकं ल्याः हे प्रस्त मजुइकं समायोजन प्रकृया न्ह्याके मफइगु खँ धाःगु दु । सुरक्षा अंगया स्थापित मापदण्ड मदुपिं लडाकुतय् समायोजन यायेमफइगु निर्णय नं बैठकं याःगु दु ।
अथेहे बैठकं माओवादीया माग कथें बहुमतीय प्रणालीयात सहमतीय प्रणालीलय् यंकेत आः हे संविधान संशोधन यायेमाःगु अवस्था मदुगु निर्णय याःगु दु । सहमतीय् प्रणालीलय् वंसाः देय् दुर्घटनाय् लायेफुगु धासें बहुमतीय प्रणालीयात हे यथावत तयेगु निर्णय याःगु खः ।
बैठक लिपा कांग्रेस प्रवक्ता अर्जुननरसिंह केसीं सहमति मजुसाः देय् सरकार विहीन जुयाः मच्वनीगु कनादिसें सहमतीय प्रणालीया बारे संविधान संशोधन यायेगु औचित्य मदुगु कनादिल । बैठकय् माओवादीं संविधानसभाया म्याद थप यायेत तःगु सर्तया बारे सहलह जुसां थुकी छुं नं कथंया लचकता क्यनेगु थाय् मदुगु निष्कर्ष पिकागु दु ।
