राष्ट्रपति शासन लागु जुइगु हल्ला जक : दाहाल
राष्ट्रपतिया प्रेस सल्लाहकार राजेन्द्र दाहालं जेठ १४ लिपा राष्ट्रपतिं शासन याइगु खँयात अस्वीकार यानादीगु दु । वय्कलं राष्ट्रपति शासन लागु जुइगु हल्ला जक जूगु धयादिसें नेपालय् राष्ट्रपति शासन लागु जुइ मफइगु धयादिल ।
त्रिभुवननगर जेसिजं बुधवाः घोराहीलय् ग्वसाःग्वःगु 'सम्भावित राजनीतिक संकट, निकास व मिडिया' विषयक अन्तर्क्रिया ज्याझ्वलय् वय्कलं राष्ट्रपतिं राजनीतिक दलत नाप सहलह मयायेकं छुं नं पला मल्ह्वनीगु दावी यानादिल । वय्कलं अन्तरिम संविधानं राष्ट्रपतियात कार्यकारी अधिकार मब्यूगुलिं कानुनी व संवैधानिक तरिकां नं राष्ट्रपति शासन लागु मजुइगु धयादिल ।
वय्कलं राजनीतिक निकासया बारे समाधान मालेगु ज्या राजनीतिक दलतय् जूगु धयादिल । दलत दथुइया द्वन्द्वया कारणं राजनीतिक संकट ब्वलंगु धयादिसें दाहालं शान्ति व संविधानया निंतिं दल मिलेजुइगुया विकल्प मदुगु धयादिल ।
