क्यान्सर अस्पतालया कार्यकारी निर्देशक बेपत्ता

चितवनया भरतपुरय् दुगु बीपी कोइराला मेमोरियल क्यान्सर अस्पतालया कार्यकारी निर्देशक डा. झक्तमान श्रेष्ठ मंगलवाः बहनी निसें बेपत्ता जुयादीगु दु । मंगलवाः बहनी भरतपुरया चौबिसकोठीलय् दुगु चितवन अस्पतालं ज्या यानाः क्वाटर वनेगु झ्वलय् श्रेष्ठ बेपत्ता जुयादीगु खः ।

मंगलवाः बहनी निसें सम्पर्क बिहीन जुयादीम्ह श्रेष्ठयात अवस्था अज्ञात जूगु व मालेगु ज्या जुयाच्वंगु खँ जिल्ला प्रहरी ज्याकूथीं धाःगु दु । आः तक नं श्रेष्ठ सम्पर्क विहीन जूगुलिं वय्कयात अपहरण याःगु आशंका याःगु दु ।

उखे नेपाल चिकित्सक संघं सम्पर्क विहीन जुयादीम्ह श्रेष्ठया अवस्था नीप्यघौ दुने पत्ता लगेमजुसाः आन्दोलन यायेगु ख्याच्वः ब्यूगु दु । संघं घटनाया घोर भर्त्सना यासें नीप्यघौ तक क्यान्सर अस्पतालया इमरजेन्सी बाहेकया दक्वं सेवा दक्व याःगु दु ।