युनिटीया निम्ह सञ्चालक विरुद्ध मुद्दा दायर
सरकारं युनिटी लाइफ इन्टरनेशनलया सञ्चालकत भीम गुरुङ व नेत्रलाल राजवंशी विरुद्ध मुद्दा दायर याःगु दु । युनिटीं गैरकानुनी रुपं निक्षेप संकलन याःगु जिकिर यासें यल जिल्ला अदालतय् मंगलवाः मुद्दा दायर याःगु खः । निम्हेसित प्रहरीं सोमवाः बहनी युनिटीया ज्याकूथी छापा मारे याःगु इलय् ज्वंगु खः । ठगीया द्वपंनय् युनिटीया खाता रोक्का यायेत व सञ्चालकयात ज्वनेत सरकारं सोमवाः बहनी हे निर्देशन ब्यूगु खः ।
गृहमन्त्रालयं सोमवाः बहनी नेपाल प्रहरी, अध्यागमन विभाग, अन्तर्राष्टिय विमानस्थल व राजस्व अनुसन्धान विभागयात गोप्य व अत्यन्त जरुरी पौ छ्वयाः युनिटीया च्याम्ह सञ्चालकतय्त तत्काल ज्वनेत लिखित निर्देशन ब्यूगु खः ।
मन्त्रालयं युनिटी इन्टरनेशनलया बारे विस्तृत विवरण संकलन यानाः अध्ययन याःगु इलय् ठगे याःगु खनेदयेवं कारवाही प्रकृया न्ह्याकूगु खः । युनिटीं बीमा व बैंकिङ्ग कम्पनी सरह कारोवार याःगु तर निगुलिं निकायपाखें अनुमति काःगु मदु । अथेहे युनिटीं दर्जनौं सरकारी नियम उल्लंघन यानाः कारोवार संचालन यानाच्वंगु तथ्य गृह मन्त्रालयं लुइकूगु दु ।
