संविधानसभाया म्याद थपे यायेगुया विकल्प मदु : प्रकाश
एकीकृत नेकपा (माओवादी)या उपाध्यक्ष नारायणकाजी श्रेष्ठ 'प्रकाशं' संविधानसभाया म्याद थपे यायेगुया विकल्प मदुगु खँ धयादीगु दु । तर वय्कलं सरकारं विपक्षी दलत नाप सहलह मयासें व राष्ट्रिय सहमति मयासें म्याद थपे यायेत स्वयाः जनतयात ध्वँ लाःगु धयादिल ।
मंगलवाः येँय् जूगु छगू साक्षात्कार ज्याझ्वलय् वय्कलं संविधानसभाया आवश्यकता जूगु धयादिसें संविधानसभाया म्याद थप यायेगु खँ निर्विकल्प जूगु धयादिल । तर म्याद थप याये न्ह्यः राष्ट्रिय सहमतिया आवश्कता जूगु धयादिल । प्रधानमन्त्री माधवकुमार नेपालं प्रधानमन्त्री पदं राजीनामा बीधुंकाः जक संविधानसभाया म्याद थप यायेफइगु खँ वय्कलं धयादिल ।
माओवादीं थ्वस्वयां न्ह्यः आःया अवस्थाय् संविधानसभाया म्याद थपे यायेगुया औचित्य मदुगु धासें थुकीया निंतिं प्रधानमन्त्रीं राजीनामा बीमाःगु व बहुमतीय प्रणाली पाखें सहमतीय प्रणालीलय् वनेमाःगु र्सत तःगु खः ।
अथेहे ज्याझ्वलय् नेपाली कांग्रेसया केन्द्रीय नेता कृष्णप्रसाद सिटौलां माओवादीं संविधान विघटन जुइमबीत आन्दोलन यानाच्वंगु इलय् सरकारं संविधानसभाया म्याद थपे यायेत संशोधन विधेयक हःगु धयादिल । वय्कलं सरकारया नेतृत्व परिवर्तनं जक गतिरोध समाधान मजुइगु धयादिसें आः आवश्यक जुसाः कांग्रेसं सरकारया नेतृत्व याइगु धयादिल । वय्कलं संविधानसभाया म्याद थप यायेगुया विकल्प मदुगु धयादिसें थुकीया बारे तर्क वितर्क मयायेत इनाप यानादिल ।
