माओवादी-कांग्रेस बैठक निष्कर्ष विहीन
एकीकृत नेकपा (माओवादी) व नेपाली कांग्रेसया शीर्ष नेतात दथुइ मंगलवाः येँया छगू होटेलय् जूगु वार्ता निष्कर्ष विहीन जूगु दु ।
ठमेलस्थित होटेल वैशालीलय् निगू दलया शीर्ष नेतातय् बैठकय् निगूलिं दलं थःथःगु अडान मत्वःतेवं बैठक निष्कर्षय् थ्यनेमफुगु खः । माओवादीं वर्तमान सरकारया राजीनामा बिनाः सहमति जुइमफइगु अडान काःगु खःसा कांग्रेसं माओवादी लडाकुया समायोजन नापं दक्वं समस्याया समाधान प्याकेजय् यायेमाःगु अडान काःगु खः ।
बैठकय् राजनीतिक गतिरोध समाधान, संविधानसभाया म्याद थप, माओवादी लडाकु समायाजेन लगायत विषयलय् सहलह जूगु खः । बैठकय् निकास मालेत वार्तायात निरन्तरता बीगु सहमति जूगु दु ।
माओवादी अध्यक्ष पुष्पकमल दाहाल 'प्रचण्डं' वार्ता सकारात्मक जूगु कनादिसें कांग्रेसं पार्टी दुने थप सहलह याये धुंकाः हानं सहलह जुइगु कनादिल । वय्कलं गुली ल्याख्य: माओवादी लडाकुतय्त समायोजन यायेगु बारे आः हे धाय् मफइगु कनादिसें क्यान्टोन्मेण्टय् वनाः न्यनेधुंकाः जक क्वःछिफइगु धयादिल ।
बैठकय् माओवादी अध्यक्ष प्रचण्ड नापं वरिष्ठ उपाध्यक्ष मोहन वैद्य व पोष्टबहादुर बोगटी व कांग्रेसया पाखें कार्यवहाक सभापति सुशील कोइराला, वरिष्ठ नेता शेरबहादुर देउवा व संसदीय दलया नेता रामचन्द्र पौडेलया ब्वति दुगु खः ।
