माओवादी 'बाग्रेनिङ'या राजनीति पाखे : पोखरेल
सूचना व संचार मन्त्री शंकर पोखरेलं माओवादीं 'बार्गेनिङ'या राजनीति यानाच्वंगु खँ धायादीगु दु । वय्कलं संविधानसभा भंग यायेगु सुयानं मनासय मदुगु व माओवादीया नं संविधानसभा समाप्त यायेगु बिचाः मदुगु धयादिसें माओवादीं सरकारया राजीनामाया पलेसा संविधानसभाया म्याद थप यायेगु धकाः 'बाग्रेनिङ'या राजनीति यानाच्वंगु द्वपं बियादीगु दु ।
नेपाल प्रेस इन्स्टिच्युटं मंगलवाः ग्वसाःग्वःगु सूचनाया हक सम्बन्धी सहलह ज्याझ्वलय् वय्कलं निदँ दुने संविधान जारी यायेत जनातं म्यान्डेट मब्यूगु धयादिसें निदँ दुने संविधान जारी यायेगु धकाः राजनीतिक सहमति जक जूगु धयादिल । जेठ १४ गते लिपा राज्यविहीन मजुइगु नं वय्कलं स्पष्ट यानादिल ।
संविधानसभाया म्याद थप यायेत दुई तिहाई बहुमत आवश्यक जूगु व माओवादीया समर्थन बिना म्याद थप याये मफइगु खँय् सरकारया प्रवक्ता नं जुयादीम्ह पोखरेलं जेठ १४ गते दुने संविधान संशोधन मजुसाः व्यवस्थापिका संसद यथावत जुइगु व संविधानसभा निष्क्रिय जुइगु धयादिल । नापं वय्कलं लिपा दुई तिहाई बहुमत खाका संविधान संशोधन जू कुन्हु स्वतः संविधानसभा क्रियाशील जुइगु धयादिल ।
