व्यापारीतय्सं अल्टिमेटम ब्यूगु मखु : जोशी
नेपाल उद्योग वाणिज्य महासंघया अध्यक्ष कुशकुमार जोशीं निन्हुया दुने सहमति यायेत राजनीतिक दलतय्त अल्टिमेटम मबीयाःगु खँ धयादीगु दु । वय्कलं निन्हुया दुने राजनीतिक दलत दथुइ सहमति जुइमाः धकाः दबाव जक बियाःगु धयादिल ।
वंगु बिहीवाः न्हय्न्यागूलिं जिल्लाया पदाधिकारीतय् आकस्मिक बैठक यानाः निन्हुया दुने सहमति यायेत नेपाल उद्योग वाणिज्य महासंघं अल्टिमेटम ब्यूगु खः । निन्हुया दुने सहमति मयासाः सतकय् जनतायात क्वकायेगु ख्याच्वःगु ब्यूगु महासंघं निन्हुया दुने सहमित मजुइवं थःपिनिगु धारणा सार्वजनिक यायेत सोमवाः याःगु पत्रकार सम्मेलनय् अध्यक्ष जोशीं जेठ १४ गते दुने सहमति यायेत राजनीतिक दलतय्त इनाप यानादिल ।
वय्कलं व्यापारीतय् ज्या राजनीति यायेगु मखुगु धयादिसें तर देशय् जटिल अवस्था दुगुलिं थःपिंसं सहमति यायेत दबाव जक बियागु धयादिल । वय्कलं थःपिंसं प्रधानमन्त्रीया राजीनामा मफ्वनाःगु स्पष्ट यानादिसें राजनीतिक सहमति कथं न्ह्याः वनेमाःगु खँय् जक बः बियागु धयादिल ।
संविधानसभा पाखें न्हूगु संविधान दयेकेमाःगु जनताया चाहना जूगु धयादिसें जोशीं संविधानसभाया म्याद थप यनाः अनं हे संविधान जारी यायेमाःगु धयादिल । वय्कलं उकीया निंतिं दलत दथुइ जेठ १४ दुने हे सहमति यायेत इनाप यानादिल ।
राजनीतिक दलत दथुइ सहमति मजुसाः राजनीतिक दलतय्त चन्दा मबीगु, सरकारयात कर मपुलेगु, जनतायात सतकय् क्वकायेगु व राष्ट्रिय सहमतिया सरकार निर्माण यायेमाःगु धासें ख्याच्वः ब्यूगु महासंघं निन्हुया दुने सहमति मजुइवं च्वंगु व्यवसायीतय् बैठकय् थंज्याःगु खँ यायेगु बारे छगू मत मजुइवं महासंघ ल्यूने सरे जूगु खँ धाःगु दु ।
