शान्ति व संविधान बारे कुटनीतिज्ञतय् च्यूताः
वर्तमान राजनीतिक गतिरोधया कारणं शान्ति प्रकृया व संविधान निर्माण यायेगु ज्या न्ह्याये मफुगु खँय् नेपाः स्थित कुटनीतिक नियोगया पदाधिकारी व थीथी देय्या राजदूतय्सं च्यूताः प्वंकूगु दु ।
सोमवाः येँया होटल अन्नपूर्णय् एकीकृत नेकपा (माओवादी) दथुइ जूगु सहलह ज्याझ्वलय् कुटनीतिज्ञतय् च्यूताःया लिस: बियादिसें अध्यक्ष पुष्पकमल दाहाल 'प्रचण्डं' सहमति मजुसाः संविधानसभाया म्याद थप यायेमफइगु धयादिल । वय्कलं सरकार सहमति याये चाहे मजूगु द्वपं बियादिसें राष्ट्रिय सहमतिया सरकार गठन मयासें संविधानसभाया म्याद थप यायेगु खँय् माओवादी सहमत जुइफइगु धयादिल ।
अथेहे कुटनीतिज्ञतय्सं माओवादी लडाकु समायोजनया बारे न्यंगु न्ह्यसःया लिसःलय् प्रचण्डं लच्छिया दुने घाःपाः जूपिं लडाकुतय्त पहिचान यायेधुंकाः जक सेनाय् समायोजन यायेगु लडाकुतय् ल्याः धायायेफइगु धयादिल । वय्कलं माओवादी सेनायात विशेष समिति अन्तर्गत तया: प्यलाया दुने समायोजन यायेमाःगु थःपिनिगु बिचाः जूगु धयादिल ।
उगु ज्याझ्वलय् अनमिनया प्रमुख करिन ल्यानग्रेन, भारत, चीन, अमेरिका लगायत झिंखुगू देय्या राजदूततय् ब्वति दुगु खसा: माओवादी पाखें अध्यक्ष प्रचण्ड नापं उपाध्यक्ष नारायणकाजी श्रेष्ठ 'प्रकाश', विदेश विभाग प्रमुख कृष्णबहादुर महरा व नेता इन्दमोहन सिक्देलया ब्वति दुगु खः ।
