संविधानसभाया म्याद दच्छि थप यायेत संशोधन विधेयक दर्ता
सरकारं संविधानसभाया म्याद दच्छि थप यायेगु कथं संविधान संशोधनया विधेयक दर्ता याःगु दु । सोमवाः च्वंगु मन्त्रिपरिषद्या बैठकं अन्तरिम संविधानया धारा ६४य् संविधान संशोधन यानाः संविधानसभाया म्याद दच्छि थप यायेगु निर्णय यायेवं संसदय् संशोधन प्रस्ताव दर्ता याःगु खः ।
संसदय् संशोधन विधेयक दर्ता यायेधुंकाः सूचना व संचार मन्त्री नापं सरकारी प्रवक्ता शंकर पोखरेलं समयसीमा दुने संविधान जारी यायेमफइगु जूगुलिं अन्तरिम संविधानया च्याक्वःगु संशोधन विधेयक दर्ता यानागु कनादिल ।
थ्वस्वयां न्ह्यः सोमवाः हे च्वंगु सरकार समर्थित झिगू दलया बैठकं जेठ १४ गते संविधान जारी यायेफइगु अवस्था मदुगुलिं संविधानसभाया म्याद दच्छिया निंतिं थप यायेत सरकारयात सुझाव ब्यूगु खः । म्याद थप यायेत तत्काल संसदय् संविधान संशोधनया विधेयक यंकेत नं झिगू दलं सुझाव ब्यूगु खः ।
थ्वहे दथुइ सोमवाः च्वंगु नेपाली कांग्रेसया केन्द्रीय समितिया बैठकं संविधानसभाया म्याद खुलां थप यायेगु प्रस्ताव याःगु दु । बैठक लिपा कांग्रेस प्रवक्ता अर्जुननरसिंह केसीं केन्द्रीय समितिया बैठकं संविधानसभाया म्याद खुलां थप यायेगु प्रस्ताव याःगु जानकारी बियादिल ।
उखे नेकपा (एमालें) धाःसा दच्छिया निंतिं म्याद थप यायेगु निर्णय या:गु दु । जेठ १ व २ गते च्वंगु केन्द्रीय कमिटीया बैठकया निर्णय सार्वजनिक यानादिसें पार्टी अध्यक्ष झलनाथ खनालं संविधानसभाया म्याद दच्छिया निंतिं थप यायेमाःगु निर्णय केन्द्रीय कमिटीया बैठकं याःगु कनादिल ।
