'प्रमया राजीनामा हे गतिरोधया निकास'
सरकारया राजनीमा फ्वंगु झिगू राजनीतिक दलया नेतातय्सं प्रधानमन्त्रीया राजीनमा हे गतिरोधया निकास जुइगु खँ धाःगु दु । सोमवाः एनेकपा (माओवादीं) येँय् विपक्षी दलत नाप याःगु अन्तर्क्रिया ज्याझ्वलय् न्ववापिं नेतातय्सं सरकारं राजीनामा बियाः सहमतिया निंतिं लँपु चायेकेमाःगु खँ धाःगु खः ।
अन्तर्क्रिया ज्याझ्वलय् न्ववानादिसें माओवादी अध्यक्ष पुष्कपमल दाहाल 'प्रचण्डं' सरकारया राजीनामा मवेकं संविधानसभाया म्याद तनेगुया छुं अर्थ मदइगु धयादिसें सरकारया राजीनामा लिपा जक सहमतिया लँपु चालीगु व संविधानसभाया म्याद थप यायेगु बारे नं सहमति जुइफइगु धयादिल । वय्कलं थ्व सरकार शान्ति व संविधान जारी यायेत असफल जुइधुंकूगुलिं शान्ति प्रकृयायात निष्कर्षय् थ्यंकेत व संविधान जारी यायेत सरकारं राजीनामा बीमागु धयादिल ।
वय्कलं आः जुइगु आन्दोलन खुन्हुन्यंकया आम हड्ताल थें शान्तिपूर्ण मजुइगु धयादिसें थ्व आन्दोलन प्रतिगामी व अग्रगामी पक्षधरतय् दथुइ जूगु धयादिल । वय्कलं झिगू दलया गठबन्धन अग्रगमनया पक्षय् दुगु धयादिसें सरकारय् नं संघीयता व धर्म निरपेक्षताया पक्षधरत दगुलिं अज्याःपिंत थःपिं नाप मोर्चाबन्दी यायेत इनाप यानादिल ।
अथेहे मधेशी जनअधिकार फोरमया महासचिव रामसहाय प्रसाद यादवं झिगू दलया मोर्चाबन्दीं वर्तमान सरकार असफल जुइधुंकूगु सन्देश ब्यूगु धयादिल । वय्कलं झिगू दलया मोर्चा लोकतन्त्रया रक्षा व अग्रगमनया निंतिं जूगु धयादिल ।
सरकारं थःपिंसं याःगु सहमति व सम्झौता पालना मायागु प्रति आक्रोश प्वंकादिसें यादवं मधेश आन्दोलन लिपा जूगु सम्झौता सरकारं उल्लंघन याःगु नापं माओवादी आन्दोलन लिपा राजीनामा बीगु धाःगु सहमति नं सरकारं उल्लंघन याःगु द्वपं बियादिल ।
नेपाल सद्भावना पार्टीया अध्यक्ष सरिता गिरीं वर्तमान सरकार पाखें संविधान जारी यायेगु अपेक्षा यायेमफइगु धयादिल । माधव नेपाल २०४७सालया संविधान दयेकूम्ह जूगुलिं वय्क पाखें संघीय गणतन्त्रया संविधान जारी यायेगु अपेक्षा यायेगु थाय् मदुगु धयादिल । वय्कलं सरकार शान्ति व संविधान जारी यायेत असफल जूगु धयादिल ।
अथेहे अन्तर्क्रिया ज्याझ्वलय् मेमेगू दलया नेतातय्सं नं सरकार दक्वं ख्यलय् असक्षम जूगु धासें वर्तमान राजनीतिक गतिरोधया निकास बीत सरकारं राजीनमा बीमागु बिचाः प्वंकूगु खः ।
