८ गते येँनं यलय् तक नेवाःतय् विरोध प्रदर्शन
येँ (सन्ध्या टाइम्स)/नेवाः स्वायत्त राज्य मंकाः संघर्ष समितिं थ्वहे वइगु जेष्ठ १४ गते यायेगु धकाः क्वःछिनातःगु प्रदर्शन ज्याझ्वः आः जेष्ठ ८ गते शनिवाः कुन्हु याइगु जूगु दु ।
१४ गते संविधान जारी यायेगु धकाः क्वःछिनातःगु न्हि जूगुलिं वखुन्हु राजनीतिक अवस्था अन्यौल जुइगु नापं राजनीतिक दलतय्गु नं आपालं ज्याझ्वःत जुइ फइगु अवस्थायात ध्यनाय् तयाः म्हिगः च्वंगु मंकाः संघर्ष समितिया मुँज्यां १४ गतेया पलेसा ८ गते जुलुस पिकायेगु निर्णय याःगु खः। वकुन्हु येँया रत्नपार्क शान्ति बाटीका लागांनिसें सुथय् ७ बजे यलया मंगलय् तक विरोध प्रदर्शन यायेगु खँ क्वःछिउगु खः ।
उगु मुँज्यां संविधानसभाया मूमू राजनीतिक पार्टीया मूमू नेतातय्गु निवासय् तकं वनाः धर्ना बीगु निर्णय नं याःगु दु।
आःया अवस्थाय् संविधानसभाया रक्षा यायेमाःगु, संघीय लोकतान्त्रिक गणतन्त्र नेपाःया सुनिश्चितता यायेमाःगु, धर्मनिरपेक्ष राज्ययात संस्थागत यायेमाःगु, स्वायत्तता व स्वशासनया अधिकार दुगु नेवाः राज्यया सुनिश्चितता यायेमाःगु, शान्ति प्रक्रियायात तार्किक निष्कर्षय् थ्यंकेमाःगु व सहमतिया लिधंसाय् अग्रगामी मंकाः सरकार दयेकेमाःगु माग यासें संघर्ष समितिं थ्व ज्याझ्वः यायेत्यंगु खः ।
थुगुसी नेवाः स्वायत्त राज्य मंकाः संघर्ष समितिं नेवाः अधिकारया सुनिश्चितताया निंतिं नेवाः आन्दोलन यायेमाःगु अवस्था ब्वलंगु खँ न्ह्यथँसें नेवाःतय्गु उगु कथंया नेवाः आन्दोलनय् ब्वति कायेत सकल नेवाःतय्त इनाप नं याःगु दु ।
संघर्षया ज्याझ्वः
- जेष्ठ ५ गते नेपाली कांग्रेसया कार्यवाहक सभापति सुशिल कोइरालाया निवास महाराजगंजय् सुथय् ८ बजेनिसें ९ बजे तक धर्ना
- जेष्ठ ६ गते एकीकृत माओवादीया अध्यक्ष पुष्पकमल दाहालया निवास नयाँबजारय् सुथय् ८ बजेनिसें ९ बजे तक धर्ना
- जेष्ठ ७ गते एमालेया अध्यक्ष झलनाथ खनालया निवास डल्लुइ सुथय् ८ बजेनिसें ९ बजे तक धर्ना ।
