जनजातितय्सं न्हूगु कथं आन्दोलन याइगु
येँ (सन्ध्या टाइम्स)/नेपाःया आदिवासी जनजातितय्सं थःपिनि हक अधिकार न्हूगु संविधानय् सुनिश्चित यायेगु नितिं मंकाः कथं न्हूगु हे स्वरुपया आन्दोलन याइगु जूगु दु ।
आदिवासी जनजातितय्गु मंकाः संगठन नेपाल आदिवासी जनजाति महासंघया म्हिगः जूगु देय्न्यंकंया प्रतिनिधितय्गु भेलां आः न्हूगु हे कथं आन्दोलन यायेगु निर्णय याःगु खः। भेलाय् संविधानसभाया राज्य पुनर्संरचना समितिं तयार याःगु प्रदेश नापं आः आदिवासी जनजाति सभासदतय्सं म्हितेमाःगु भूमिकाया विषयात कयाः सहलह जूगु खः। उगु भेलाय् वःगु सुझावयात ध्यानय् तयाः थौं हे जनजाति महासंघं आदिवासी जनजातितय्सं दयेका तःगु थीथी कथंया मंकाः मोर्चाया प्रतिनिधितलिसे सहलह ब्याकीगु जूगु दु ।
अथे हे याकनं हे आदिवासी जनजाति सभासद सभा ककसया प्रनिनिधितलिसे नं सहलह ब्याकाः आन्दोलनया स्वरुप तयार यायेगु नापं आन्दोलन पित बीगु जुइ धकाः महासंघया महासचिव आङकाजी शेर्पां धयादीगु दु ।
