छत्रपाटी चिकित्सालयय् मातृशिशु कक्ष
येँ (सन्ध्या टाइम्स)/थनया १७ वडाय् च्वंगु छत्रपाटी निःशुल्क चिकित्सालयय् म्हिगःनिसें मातृशिशु कल्याण कक्ष नं चायेकूगु दु। म्हिगः छगू ज्याझ्वःया दथुइ नेपाःया निंतिं संयुक्त राष्ट्र संघया आवासीय प्रतिनिधि रबर्ट पाइपरं उगु कक्षया उलेज्या यानादीगु खः ।
उगु हे ज्याझ्वलय् उगु कक्षया थप विकासया निंतिं युएनडब्लुया प्रेसिडेण्ट मय्जु म्यागी पाइपरं १० लाख तकाया चेक नं चिकित्सालयया अध्यक्ष विजयबहादुर मालीयात लःल्हानादीगु खः ।
ज्याझ्वलय् चिकित्सालयया अध्यक्ष मालीं चिकित्सालय बारे ध्वाथुइकादीगु खः। लिसें भाजु रबर्ट पाइपर, मय्जु म्यागी पाइपर व जन थापापिंसं नं नुगःखँ प्वंकादीगु खः ।
