नागरिक समाजं संविधानसभाया म्याद थपे यायेत इनाप
नागरिक समाजया अगुवातय्सं सोमवाः स्वंगू प्रमुख दलया शीर्ष नेतातय् नापलाना संविधानसभाया म्याद थपे यायेत इनाप याःगु दु । उमिसं जेठ १४ गते संविधान जारी मजुइगु अवस्थाय् म्याद थपे यायेगुया विकल्प मदुगु खँ धाःगु दु ।
सोमवाः माओवादी अध्यक्ष पुष्पकमल दाहाल 'प्रचण्ड', कांग्रेस कार्यवहाक सभापति सुशील कोइराला व एमाले अध्यक्ष झलनाथ खनालयात बिस्कं बिस्कं नापलाना नागरिक अगुवातय्सं जेठ १४ लिपा संवैधानिक रित्तता वयेमबीत संविधानसभाया म्याद थपे यायेमाःगु खँय् बः ब्यूगु खः । अगुवातय्सं आन्दोलन पाखें प्राप्त राजनीतिक उपलब्धीतय् रक्षाया निंतिं संविधानसभायात बचे यानाः तयेमाःगु सुझाव ब्यूगु खः ।
नागरिक अगुवात पद्मरत्न तुलाधर, दमननाथ ढुंगाना, डा. देवेन्द्रराज पाण्डे, मथुराप्रसाद श्रेष्ठ लगायतया पुचः नेतातय् छेँय् वनाः राजनीतिक दलत दथुइ खनेदुगु संवादहीनतायात क्वचायेकाः तत्काल वार्ताय् च्वनेत इनाप याःगु खः । दलत दथुइ सहमतिया निंतिं मध्यस्थकर्ता यायेत थःपिं तयार जूगु खँ नं अगुवातय्सं धा:गु खः ।
