एमआरपीया निंतिं टेण्डर आह्वान
परराष्ट्र मन्त्रालयं मेसिन रिडेबल पासपोर्ट (एमआरपी) छपाइया निंतिं सोमवाः टेण्डर आह्वान याःगु दु । टेण्डरय् भारत व चीनया कम्पनीइ नं ब्वति कायेदइगु कथं आह्वान याःगु खः । थ्वस्वयां न्ह्यः सार्वजनिक खरिद ऐन उल्लंघन यानाः भारतीय सरकारी कम्पनीयात छपाईया जिम्मा बीगु सरकारया पुलांगु निर्णयया मेमेगू दलतय्सं तच्वकं विरोध याःगु खः ।
उगु विरोध लिपा छिमेकी देय्या कम्पनीयात टेण्डर प्रकृयाय् ब्वति कायेमदइगु व्यवस्था यायेमाःगु खँय् थीथी पक्षं बः ब्यूगु खः । छिमेकी देय्यात छपाइया जिम्मा ब्यूसाः देय्या महत्वपूर्ण सूचं चुहावट जुइफइगु धासें विज्ञतय्सं टेण्डर प्रकृयाय् छिमेकी देय्यात ब्वति कायेमदइगु निर्णय यायेमाःगु खँ धाःगु खः ।
मन्त्रालयं दक्वं अन्तर्राष्ट्रिय कम्पनीया निंतिं खुल्ला याःगु टेण्डरया निंतिं पीन्यान्हु दुने निवेदन बीमाःगु व्यवस्था यानातःगु दु । छापइ कम्पनीं थ्वस्वयां न्ह्यः मेगू निगू देय्या पासपोर्ट छापे यायेधुंकूगु प्रावधन दयेमाःगु व छपे याइगु कम्पनीया बार्षिक १ करोड ३० लख अमेरिकी डलर कायम जुइमाःगु प्रावधान दु । टेण्डर कथं २०१० नोभेम्बरया दुने एमआरपी छपाइ क्वचायेकेमाःगु दु ।
