माओवादीं जेठ १५ गते जनसंविधान घोषणा याइगु
एकीकृत नेकपा (माओवादीं) थ्वहे वइगु जेठ १५ गते जनसंविधानया मस्यौदा घोषणा याइगु जूगु दु ।
माओवादीया मू ज्याकू पेरिस डाँडाय् आइतवाः च्वंगु पोलिटब्यूरो दुजःतय् बैठकं जेठ १५ गते पार्टीं भव्य रुपं गणतन्त्र दिवसया लसताय् ज्याझ्वः यायेगु व अन हे थःगु पार्टीं तयार याःगु जनसंविधानया मस्यौदा घोषणा यायेगु ज्याझ्वः क्वःछिउगु दु । पार्टी प्रवक्ता दिनानाथ शर्मां गणतन्त्र दिवसया न्हि कुन्हु माओवादीं तयार याःगु 'जनताया संघीय लोकतान्त्रिक गणतन्त्र संविधान' घोषणा यायेगु कनादिल ।
जेठ १५ गते गणतन्त्र दिवस न्यायेकेत व जनसंविधानया मस्यौदा घोषणा यायेगु पाखे सम्पूर्ण ध्यान केन्द्रीत यायेत माओवादीं थ्वस्वयां न्ह्यः हे जेठ ११ गते देय्न्यंक यायेगु धका: क्व:छिनात:गु जनसभा स्थगित याःगु खः । अथेहे जेठ ४ गते निसें यायेगु धाःगु आन्तरिक प्रशिक्षणया ज्याझ्वः नं स्थगित याःगु दु ।
अथेहे माओवादीं संविधानसाभाया म्याद तनेत बहुमतीय प्रणाली पाखें सहमतीय प्रणालीलय् वनेमाःगु व सरकारया राजीनामा यायेगु निगू र्शत न्ह्यब्वःगु दु । पार्टी प्रवक्ता शर्मां थुगु हे सरकारया आयू ताःहाक यायेगु निंतिं संविधानसभाया म्याद थप याये मफइगु कनादिसें सरकारं राजीनामा बीधुंकाः जक संविधानसभाया म्याद तनेफइगु कनादिल ।
