नेपाः धर्मनिरपेक्ष राज्य जुइफइमखु : थापा
राष्ट्रिय प्रजातन्त्र पार्टी नेपालया अध्यक्ष कमल थापां नेपाः छुं नं हालतं धर्मनिरपेक्ष राज्य जुइमफइगु खँ धायदीगु दु । वय्कलं प्यदँ निसें धर्मनिरपेक्षया नांमय् झिगू लख स्वयां अप्व मनूतय्त धर्म परिवर्तन याकूगु दाबी यानादिसें न्हूगु संविधानय् धर्मनिरपेक्ष राज्यया सुनिश्चितता यायेत फान्सेली राजदूतं नेपाः सरकारयात पौ छ्वःगु धायादिसें आपत्ति प्वंकादिल ।
राप्रपाया नीक्वःगु स्थापना दिवसया लसताय् आइतवाः येँय् जूगु छगू ज्याझ्वलय् न्ववानादिसें वय्कलं राप्रपा नेपाल धार्मिक अतिवादया पक्षय् मदुगु धयादिसें हिन्दू राष्ट्र नेपाःया पहिचान जूगुलिं थःगु पार्टी नेपाःयात हिन्दू राष्ट्र घोषणा यायेमाःगु पक्षय् दुगु धयादिल । अथेहे वय्कलं थःगु पार्टी प्रतिगामी व पुनरुत्थानवादी पार्टी मजुसां जुजु सहितया प्रजातन्त्रया पक्षय् दुगु धयादिल ।
वय्कलं राष्ट्रिय स्वाधीनता व प्रजातन्त्रया निंतिं थःगु पार्टीं याकनं आन्दोलन याइगु धयादिल । वय्कलं थःपिनिगु उदेश्य आर्थिक समृद्धिया निंतिं जूगु धयादिसें मेगू दलत थें सत्ता व स्वार्थया निंतिं मजूगु दावी यानादिल ।
