'शान्ति व संविधानया निंतिं कांग्रेस नेतृत्वया सरकार'
नेपाली कांग्रेसया सभासद्तय्सं आः गठन जुइगु न्हूगु राष्ट्रिय सहमतिया सरकारया नेतृत्व कांग्रेसं यायेमाःगु खँ धाःगु दु । पार्टी पदाधिकारी सहित आइतवाः च्वंगु कांग्रेस संसदीय दलया बैठकय् शान्ति व संविधान निर्माणया सुनिश्चितता यायेत सरकारया नेतृत्व कायेत सभासद्तय्सं नेतृत्वयात दबाव ब्यूगु दु ।
सिंहदरवारय् दुगु कांग्रेसया संसदीय दलया ज्याकूथी च्वंगु बैठकय् अधिकांश सभासद्तय्सं झिंनिगू बुँदे सम्झौता निसें आः तक कांग्रेसं शान्ति प्रकृयाय् म्हितुगु भूमिकाया आधारय् आः कांग्रेसं हे नेतृत्व यायेमाःगु बिचाः प्वंकूगु खः ।
सभासद्तय्सं शान्ति प्रकृया पूवंकेगु विस्तृत कार्ययोजना नापं माओवादी सेनाया समायोजन व संविधान निर्माणया कार्यतालिका दयेकाः संविधान संशोधन यायेत सुझाव ब्यूगु ख: । अथेहे सभासद्तय्सं शान्ति प्रकृया व संविधान निर्माणया निंतिं प्रतिबद्धता व कार्यन्वयनया सुनिश्चिता प्याकेजय् मवयेकं संविधानसभाया म्याद थपे यायेगु औचित्य मदइगु खँ सभासद्तय्सं धाःगु खः ।
कांग्रेस प्रवक्ता अर्जुननरसिंह केसीं कांग्रेस संविधानसभाया म्याद थप यायेगु पक्षय् हे दुगु कनादिसें दलत दथुइ सहमति जुसाः कांग्रेस बाधक मजुइगु कनादिल । वय्कलं थुकीया निंतिं शान्ति प्रकृया व संविधान निर्माणया सुनिश्चिता आवश्यक जूगु कनादिल ।
