जेष्ठ १४ गते नेवाःतय्गु विरोध प्रदर्शन
येँ (सन्ध्या टाइम्स)/नेवाः स्वायत्त राज्य मंकाः संघर्ष समितिं थ्वहे वइगु जेष्ठ १४ गते येँय् नेवाःतय्गु छगू तःजिगु विरोध प्रदर्शन याइगु जूगु दु ।
संविधान जारी यायेगु मिति जेष्ठ १४ गते जुयाः उखुन्हु हे नेवाः स्वायत्त राज्यया ग्यारेन्टी जुइमाः धइगु माग यासें नेवाःतय्सं उगु प्रदर्शन यायेत्यंगु खः ।
उगु प्रदर्शनया तयारी यायेगु निंतिं थौं संघर्ष समितिया बैठक च्वनेत्यंगु दु। बैठकं १४ या विरोध प्रदर्शन व स्वयां न्ह्यः यायेमाःगु ज्याझ्वः बारे सहलह याइ धाःगु दु ।
वंगु शुक्रवाः जक मंकाः संघर्ष समितिपाखें मंकाः संघर्ष समितिइ दुथ्याःगु खलः पुचः, थीथी लागाया समन्वय समिति नापं नेवाः ख्यःया न्ह्यलुवातय् सहलह ब्याकूगु खः।
शुक्रवाः जूगु उगु सहलह मुँज्याय् नेवाःतय्सं नेवाः स्वायत्त राज्यया नितिं आन्दोलन यायेगु बाहेक मेगु विकल्प हे मदुगु, नेवाः स्वायत्त राज्यप्रति माओवादी सकारात्मक दुसां कांग्रेस व एमाले सकारात्मक मदुगुलिं इमित दवाव बीगु ज्याझ्वः हयेत नं सुझाव वःगु खः ।
नरेशवीर न्हूम्ह नायः
येँ (सन्ध्या टाइम्स)/नेवाः स्वायत्त राज्य मंकाः संघर्ष समितिया न्हूम्ह नायः नेपाः राष्ट्रिय पार्टीया नेवाः न्ह्यलुवाःया कजि नरेशवीर शाक्य जुयादीगु दु। लय् लय् पतिकं नायः हिलेगु प्रावधान कथं म्हिगःनिसें हे भाजु शाक्य नायः जुयादीगु खः। वय्कःया अध्यक्षताय् थौं न्हापांखुसी समितिया बैठक च्वनेत्यंगु दु। आः लछि लिपा ज्यापु महागुथिया नायः विपेन्द्र महर्जन मंकाः संघर्ष समितिया नायः जुयादी ।
