ताहाननिइ छेँ च्याःथाय् निम्ह द्यः नं नष्ट
येँ (सन्ध्या टाइम्स)/वंगु वैशाख ३ गते येँया ताहाननिइ छक्वलं खुखा छेँ झौ जुइक च्याःगु घटनाय् लानाः पाहां चःर्हेबलय् खतय् तयाः जात्रा यायेमाःम्ह गणेद्यः व कुमार द्यःया मूर्ति नं नष्ट जूगु खँ सीदुगु दु। २ बाइ ३ फिट साइजया थ्व द्यःत सिजलं दयेकाः लुं सियातःपिं खः। लिसें उकी लानाः नेवाःतय् सांस्कृतिक बाजं व पचिमा ज्वलं नं फुक्कं मिं नयाः नष्ट जूगु खँ ताहाननी अग्नी पीडित राहत संकलन समितिं धाःगु दु ।
छेँ मिं नयाः घरवारविहिन जूपिं सम्बन्धित पीडित नेवाः दाजुकिजापिं थौंकन्हय् पाल ग्वयाः च्वनाच्वंगु दु।
थ्वहे झ्वलय् उकी लानाः पीडित जूपिं नेवाः दाजुकिजापिंत ग्वाहालि चूलाकेगु व नष्ट जूगु द्यः व सांस्कृतिक ज्वलंया पुनर्व्यवस्था गुकथं यायेगु धइगु खँयात कयाः सहलह ब्याकेत राहत संकलन समितिं कंस मंगलवाः छगू वृहत् मुँज्या यायेत्यंगु दु ।
इतुम्बाहाःया ताहाननीइ मंगलवाः सुथसिया ७.३० बजे जुइगु उगु मुँज्या राहत संकलनया नापं थुकिया लागिं आः छु ज्या याये माली धइगु बारे सहलह यायेत जुइत्यंगु खँ ज्याझ्वःया संयोजक प्रज्ञारत्न शाक्यं कनादीगु दु ।
