आन्दोलनया लागिं उठे याःगु दां ग्व?
येँ (सन्ध्या टाइम्स)/माओवादीं अनिश्चितकाल तक न्ह्याकेगु धकाः शुरु याःगु आम हडताल दथुइ हे दिकेवं उगु हडतालया लागिं धकाः उठे यानातःगु करोडौं दां आः गन वन धकाः कार्यकर्तां न्ह्यसः तया हःगु दु। निर्णायक आन्दोलन यायेगु धकाः माओवादीं थुगुसी युद्धकालय् थें हे चन्दा काःगु खः।
आन्दोलनया प्रशिक्षण बीगु झ्वलय् पार्टी महासचिव रामबहादुर थापा (बादलं) थुगुसी सिंहदरवारय् दुहां वनाः अन पार्टीया ध्वाँय् ब्वयेकेगु हे झीगु गोप्य रणनीति खः धकाः कार्यकर्तातय्त धयातःगु कारणं आपालं कार्यकर्ता सिंहदरवार घेराउ ज्याझ्वः आः दुने वनाः ध्वाँय् ब्वयेकाः जक हे क्वचाइगु जुइ धकाः ढुक्क जुयाच्वंगु खः ।
थ्वहे झ्वलय् आन्दोलन स्थगन धुंकाःया न्हापांगु पोलिटब्यूरो बैठक थौं च्वनेत्यंगु दु। थ्व मुँज्यायात माओवादीं जेष्ठ १४ न्ह्यःया अन्तिम मुँज्या नं धाःगु दु। मुँज्या जेष्ठ १४ गते संविधानसभाया म्याद थपे मजुल धाःसा छु यायेगु धइगु खँ केन्द्रित जुइ धाःगु दु ।
