माओवादीया कारणं शान्ति व संविधान संकटय् : महत
ऊर्जा मन्त्री डा. प्रकाशशरण महतं एकीकृत नेकपा (माओवादी) शान्ति व संविधान निर्माण यायेगु ज्याय् गम्भीर मजूगु द्वपं बियादीगु दु । वय्कलं माओवादीया कारणं हे शान्ति व संविधान संकटय् लाःगु दावी यानादिल ।
नेपाल प्रेस युनियन मोरङं आइतवाः विराटनगरय् याःगु पत्रकार नापलायेगु ज्याझ्वलय् वय्कलं माओवादीं वाइसीएलया अर्थ सैन्य संरचना भंग मयागु कारणं देय्या मू मुद्दा छखे लाःवंगु द्वपं बियादिल । वय्कलं माओवादीयात लोकतान्त्रिक शक्तिलय् रुपान्तरण जुयाः शान्ति व संविधान निर्माण यायेगु ज्याय् इमान्दार जुइत इनाप यानादिल ।
मन्त्री महतं आःया मू खँ संविधान निर्मण यायेगु जक मखसें जनताया हितया निंतिं लोकतान्त्रिक संविधान गुकथं दयेकेगु धइगु प्रमुख विषय जूगुलिं सरकार उकीया निंतिं गम्भीर जूगु धयादिल । वय्कलं जेठ १४ गते संविधान जारी मजुइगु पक्का जूगुलिं देय्यात संवैधानिक संकट पाखें बचे यायेत दक्व पक्षययात इनाप यानादिल ।
