'संविधानसभाया म्याद थपे मयासाः न्हूगु निर्वाचन'
वाणिज्य व आपुर्ति मन्त्री राजेन्द्र महतों संविधानसभाया म्याद थपे मयासाः न्हूगु जनादेशया निंतिं निर्वाचनय् वनेमाःगु खँ धयादीगु दु । वय्कलं सत्ता व भत्ताया निंतिं जक संविधानसभाया म्याद थप यायेमज्यूगु धयादिसें म्याद थपे यायेगु खःसा प्रमुख स्वंगू दलं संविधान निर्माणया विश्वस्त आधार तयार यानाः मेमेगू दलयात विश्वासय् कयाः जक थपे यायेमाःगु बिचाः प्वंकादिल ।
आइतवाः जनकपुरय् व्यापारी व पत्रकारतय् भेलाय् न्ववानादिसें मन्त्री महतों माओवादीं संविधान निर्माण यायेत पंग थनाच्वंगु द्वपं बियादिसें संविधान निर्माण प्रक्रियायात दुई तिहाई प्रावधान पाखें सहमतीय आधार दयेकेमाःगु धयादिल । वय्कलं सहमतीय आधारय् निर्माण जूगु संविधानयात जक जनतां स्वीकार याइगु दाबी यानादिल ।
सद्भावना पार्टीया अध्यक्ष नं जुयादीम्ह मन्त्री महतों थःगु पार्टी लोकतान्त्रिक प्रक्रियाया आधारय् सरकार परिवर्तनया पक्षय् दुगु धयादिल । वय्कलं थः प्रचण्ड वा माधव नेपालया पक्षय् मदुगु धयादिसें थः सहमतीय वा बहुमतीय प्रणाली पाखें सरकार परिवर्तन यायेमाःगु पक्षय् दुगु धयादिल ।
