कांग्रेसं संविधानसभाया म्याद थपे यायेगु निर्णय
नेपाली कांग्रेसं देय्यात संवैधानिक संकट पाखें बचे यायेत संविधानसभाया म्याद थपे यायेमाःगु निर्णय याःगु दु ।
कांग्रेस केन्द्रीय ज्याकू सानेपाय् शनिवाः च्वंगु केन्द्रीय समितिया बैठकं संविधानसभाया म्याद थपे यायेमाःगु निर्णय याःगु खः । बैठकय् न्ववाःपिं अधिकाशं दुजःतय्सं संविधानसभा पाखें संविधान जारी जुइगु सुनिश्चिता जुइधुंकाः जक संविधानसभाया म्याद तनेमाःगु सुझाव ब्यूगु खः । उकीया निंतिं दकलय् न्हापां शान्ति प्रकृया पूवंकेमाःगु खँय् दुजःतय्सं बः ब्यूगु खः ।
केन्द्रीय समितिं संविधानसभाया म्याद थपे यायेगु निर्णय याःसां गुली ईया निंतिं थपे याये धाःसा निर्णय यायेमफुत । गुलीया निंतिं म्याद थप यायेगु बारे निर्णय यायेत केन्द्रीय समितिय व ससंदीय दलया मंकाः बैठक च्वना: क्वःछीगु जूगु दु । थुकीया बारे सहलह यायेत आइतवाः सिंहदरवारय् च्वंगु कांग्रेस संसदीय दलया सभाकक्षय् मंका: बैठक च्वनीगु जूगु दु ।
अथेहे थौंया बैठकय् संविधानसभाया म्याद संविधान संशोधन यानाः थपे यायेगु वा संकटकाल लागू यानाः थपे यायेगु बारे सहलह जुसां निर्णया धाःसा जुइमफुत ।
