वर्तमान अवस्थाय् संविधानसभाया ई थपे याये असम्भव : झिगू दल
एकीकृत नेकपा (माओवादी) सहित झिगू दलं वर्तमान अवस्थाय् संविधानसभाया ई थपे याये असम्भव जूगु निष्कर्ष पिकागु दु । शनिवाः माओवादी मू ज्याकू पेरिस डाँडाय् च्वंगु झिगू दलया बैठकं शान्ति व संविधान जारी यायेत वर्तमान सरकार असक्षम जूगुलिं थ्व सरकार विघटन मजुइकं संविधानसभाया म्याद थपे याये मफइगु निष्कर्ष पिकागु खः ।
बैठक लिपा सद्भावना पार्टीया अध्यक्ष सरिता गिरीं बैठकय् झिगू दलं माधव नेपाल नेतृत्वया सरकार शान्ति प्रकृया व संविधान निर्माणया बाधक जूगु निष्कर्ष पिकासें थ्व सरकार विघटन मजुतल्ले संविधानसभाया म्याद थपे यायेगु छुं औचित्य मदइगु निष्कर्ष बैठकं पिकागु कनादिल ।
बैठकं राजनीतिक दलत दथुइ सहमति कायम यानाः राष्ट्रिय सहमतिया सरकार गठन यायेत वर्तमान सरकारयात तत्काल राजीनामा बीत माग याःगु दु । अथेहे बैठकय् संविधान निर्माण, सेना समायोजन, राष्ट्रिय सहमतिया सरकार गठनया बारे खँल्हाबंला जूगु दु ।
झिगू दलं वर्तमान राजनीतिक अवस्थाया बारे सोमवाः नागरिक समाज नाप अन्तर्किया यायेगु ज्याझ्वः क्वःछिउगु दु । सोमवाः बृहत्त अन्तक्रिया ज्याझ्वः झिगू दलं मंकाः रुपं ग्वसाःग्वइगु खँ माओवादी उपाध्यक्ष नारायणकाजी श्रेष्ठ 'प्रकाशं' कनादिल । अन्तक्रिया ज्याझ्वः व्यवस्थापन यायेगु जिम्मेवारी धाःसाः माओवादीयात ब्यूगु दु ।
अथेहे झिगू दल दथुइया स्वपु अझ क्वतुकाः थुकीयात मोर्चाया रुप बीत सहलह जूगु खँ नं माओवादी उपाध्यक्ष प्रकाशं कनादिल । संविधान निर्माण, शान्ति प्रकृया नापं राष्ट्रिय सहमतिया सरकारया निंतिं मंकाः रुपं दवाव बीत थंज्याःगु मोर्चा दयेकाः न्ह्याः वनेगु बारे सहलह जूगु खः ।
बैठकय् माओवादी नापं मधेसी जनअधिकार फोरम, सदभावना पार्टी, नेपाः राष्ट्रिय पार्टी, राष्ट्रिय जनमुक्ति पार्टी, संघीय लोकतान्त्रिक राष्ट्रिय मञ्च, चुरेभावर राष्ट्रिय एकता पार्टी लगायतया ब्वति दुगु ख: ।
