सरकार संसदया रिमोट कन्ट्रोल पाखें संचालित : प्रम
प्रधानमन्त्री माधवकुमार नेपालं वर्तमान सरकार माओवादीं धाःथें विदेशीया रिमोट कन्ट्रोल पाखे मखसें संसदया रिमोट कन्ट्रोल पाखें संचालित जूगु दाबी यानादीगु दु । माओवादीं थःपिं नाप सहमत जूपिंत जक नेपाली जनता खनीगु धयादिसें प्रधानमन्त्री नेपालं नीन्यागू दल व नेपाली जनताया ल्हातय् रिमोट कन्ट्रोल दुगु धयादिल ।
नेकपा (एमाले) सम्बद्ध युवा संघया स्थापना दिवसया लसताय् शनिवाः येँय् जूगु ज्याझ्वलय् न्ववानादिसें प्रधानमन्त्री नेपालं माओवादीया दम्भ व धम्कीया न्ह्यने आत्मसमपर्ण मयायेगु धयादिल । राष्ट्रिय सहमतिया नांमय् माओवादीया शर्त स्वीकार यायेमफइगु धयादिसें वय्कलं सहमतिया निंतिं माओवादीं नं त्याग यायेमाःगु व थः नं त्याग यायेत तयार जूगु धयादिल ।
माओवादी प्रति आक्रामक खनेदुम्ह प्रधानमन्त्री नेपालं माओवादीं न्हापा याःगु सम्झौता पालना मयातल्ले सहमति जुइमफइगु धयादिल । शान्ति व संविधान जारी यायेगु बारे सहमति जुसाः राष्ट्रिय सहमतिया सरकारया बारे नं सहमति जुइगु धयादिल । उकीया निंतिं माओवादी सेनाया व्यवस्थापन, वाइसीएलया अर्ध सैन्य संरचना भंग लगायत शान्ति नाप स्वाःगु विषयया बारे न्हापा निर्णय यायेमाःगु खँय् वय्कलं बः बियादिल ।
वय्कलं माओवादीं आम हड्ताल कुर्सीया निंतिं याःगु व लित नं वहे उदेश्य पूवंकेत काःगु धयादिसें थुकीं सरकारयात छुं नं नैतिक दवाव मलाःगु स्पष्ट यानादिल । वय्कलं संसदया स्वसः व स्वीम्ह सभासद् दुगु दलतय्सं थःत समर्थन यानाच्वंगु दावी यानादिसें थःम्ह राजीनामा मबीगु धयादिल ।
