'प्रधानमन्त्रीयात राजीनामा मबीत झीसं सुझाव बियागु'
प्रधानमन्त्री माधवकुमार नेपालं सहमतिया सरकार गठन जुसाः थः बाधक मजुइगु धयाः राजीनमा बीगु संकेत वःगुलिं थःपिंसं राजीनामा मबीत सुझाव बियागु खँ उपप्रधानमन्त्री सुजाता कोइराला धयादीगु दु ।
नीक्वःगु शिक्षक संघ दिवसया लसताय् वीरगंजय् शनिवाः जूगु ज्याझ्वलय् न्ववानादिसें वय्कलं माओवादीं थःगु व्यवहारय् सुधार मयायेकं प्रधानमन्त्रीं राजीनामा बीमज्यूगु धयादिल । वय्कलं वधुंकाः जक सहमतिय सरकारया निंतिं प्रधानमन्त्रीं राजीनामा बियादीगु धयादिल । वय्कलं अज्याःगु सहमतिय सरकारं संविधान जारी याइगु, संसदीय चुनाव याइगु व न्हूगु नेपाल निर्माण लगायतया ज्या याइगु धयादिल ।
माओवादीयात थःपिंसं तसकं बांलाक म्हसीके धुंकागु दावी यानादिसें कोइरालां उमिगु खँय् थःपिंत विश्वास मदुगु धयादिल । लिब्बाक जुसां माओवादी शान्ति प्रकृयाय् वइगुलिइ थःपिं विश्वस्त जूगु नं धयादिल । माओवादीं छुं लचकता क्यंसां माओवादीयात विश्वास यायेमफइगु धयादिल ।
वय्कलं माओवादीं थःगु लडाकु शिविर खाली यायेमाःगु, ल्वाभः त्वःतेमाःगु, माओवादी लडाकु पुनःस्थापना व समायोजन यायेत ग्वाहालि यानाः नेपाली जनता व बुद्धिजीविया विश्वास त्यकेमाःगु धयादिसें थंज्याःगु मू ज्या मयायेकं माओवादीयात सरकारया नेतृत्व याये बीमज्यूगु धयादिल ।
