माओवादी-कांग्रेस प्याकेजय् सहमति मालेत सहमत
राजनीतिक गतिरोधया समाधान प्याकेजय् हे यायेत एकीकृत नेकपा (माओवादी) व कांग्रेस सहमत जूगु दु । शनिवाः सुथय् माओवादी अध्यक्ष पुष्पकमल दाहाल 'प्रचण्ड' व नेपाली कांग्रेसया कार्यवहाक सभापति सुशील कोइराला दथुइ छगू खँल्हाबंला लिपा निगूलिं दलया नेतात गतिरोध ज्यंकेत प्याकेजय् सहमति यायेत तयार जुयादीगु खः ।
खँल्हाबंला लिपा कांग्रेस कार्यवहाक सभापति कोइरालां वर्तमान राजनीतिक परिस्थितिया बारे खँल्हाबंला जूगु धयादिसें उकीया समाधानया विषलय् सहलह जूगु धयादिल । वय्कलं समस्याया समाधान प्याकेजय् हे मालेगु बारे सहमति जूगु नं कनादिल ।
प्रचण्ड निवास न्हू बजारय् जूगु खँल्हाबंलाय् निम्ह नेतात दथुइ संविधानसभाया म्याद तनेगु, माओवादी लडाकु समायोजन, राष्ट्रिय सहमतिय सरकार आदिया बारे खँल्हाबंला जूगु खः । कोइरालां खँल्हाबंलाय् माओवादी अध्यक्ष प्रचण्ड सकारात्मक जूगु कनादिसें याकनं हे सहमति जुइगुलि थः आशावादी जूगु कनादिल ।
वय्कपिं दथुइ गतिरोध अन्त्यया निंतिं दक्व पक्ष नाप परामर्श यानाः न्ह्याः वनेगु बारे नं सहलह जूगु खः ।
