थीथी दुर्घटनाय् खुम्ह सित, गुम्ह घाःपाः
बुटवलय् व सुनसरीलय् जूगु निगू बिस्कं बिस्कं दुर्घटनाय् लानाः निम्ह भारतीय नागरिक सहित खुम्ह सीगु दुसाः गुम्ह घाःपाः जूगु दु ।
शनिवाः सुथय् पूर्व-पश्चिम राजमार्ग अन्तर्गत सुनसरीया हरिपुरय् छम्ह मचा नापं निम्ह सीगु दु । जोगवनी पाखें सप्तरीया फत्तेपुरय् जन्ती ज्वना वनाच्वंगु ना. ३. ख. २५३२ नम्बरया बसयात ना. ३. ख. ३८७९ नम्बरया बसं ठक्कर ब्यूवलय् भारतया अररियाया न्हय्दँया रोनक खातुन व नीन्हय्दँया मोहम्मद मेहेतक सीगु खः ।
दुर्घटनाय् भारतया अरपरयाया स्वीदँया मोहम्मद ज्याउल रहमान घाःपाः जूगु दु । घाःपाः जूम्ह रेहमानयात वीपी कोइराला स्वास्थ्य विज्ञान प्रतिष्ठान धरानय् वासः याकातःगु दु ।
उखे शुक्रवाः सनिलय् पूर्व-पश्चिम राजमार्गया नारायणगढ बुटवल सतकखण्ड अन्तर्गत देउराली गाविसया रुम्सी धाःगु थासय् जूगु दर्घटनाय् प्यम्ह सीगु दु । लु. १. ज. १२८७ नम्बरया पिकअप जीप सतक पाखें स्वसः मिटर क्वयय् कुतुवनाः नीन्यादँया धनमया गाहामगर, वय्कया स्वलाया म्हयाय् सीमा गाहा, स्वीदँया गनिसरा गाहा व पिकअप चालक सुसन महतो सीगु खः ।
अथेहे दुर्घटनाय् च्याम्ह घाःपाः जूगु दु । घाःपाः जूपिंनि कालीगण्डकी सामुदायिक अस्पताल कावासोती व भरतपुर अस्पतालय् वासः जुयाच्वंगु खँ प्रहरीं धाःगु दु ।
