भूटानी शरणार्थीया रेमिटेन्स
येँ (सन्ध्या टाइम्स)/भूटानी सरकारं लिना हःगु कारणं नेपाःया थीथी शरणार्थी क्याम्पय् च्वनाच्वंपिं भूटानी शरणार्थीतय् जीवनस्तर नं आः छुं भचा थहां वःगु दु, रेमिटेन्सया कारणं ।
नेपालय् च्वनाच्वंपिं थ्व शरणार्थीतय्त अमेरिका, अष्ट्रेलिया लगायतया देय्तय्सं थःपिंथाय् पुनर्वास यायेगु धकाः उखे यंकेगु शुरु याःगु खः। दछि ति न्ह्यः उखे वंपिं भूटानी शरणार्थीतय्सं अन ज्या यानाः आः झापाया शरणार्थी शिविरय् च्वनाच्वंपिं थःथितिपिंथाय् छुं छुं ध्यबा नं छ्वया हयेगु शुरु याःगु दु। उमिसं ध्यबा छ्वया हःगुलिं आः थःपिंत छुं भचा राहत जूगु खँ शरणार्थी शिविरय् च्वनाच्वंपिं शरणार्थीतय्सं धाःगु दु ।
अमेरिका व युरोपया थीथी देशं भूटानी शरणार्थीतय्त थःपिनि देशय् यंकाः पुनर्वास याकेगु धाःसां सकलें शरणार्थीयात यंकेगु ज्या धाःसा अझं मजूनि। गुलि नं शरणार्थीत उखे वंगु खः उमिसं अन थीथी पसः, कारखानाय् ज्या यानाच्वंगु दु।
विदेश वनेखंपिं थःथितिपिंसं ध्यबा छ्वयेगु शुरु यानाहःगुलिं आः थःपिंत 'छेँ खर्च' चले यायेत अःपूगु खँ धाःगु दु। विदेशं ध्यबा छ्वया हइपिं मनूत अप्वया वःलिसे गुलिखे रेमिटेन्स कम्पनीतय्सं आः शरणार्थी शिविरया पिने हे थःपिनि पसः चायेकेगु नं शुरु याना हःगु दु ।
शरणार्थी शिविरय् च्वनाच्वंपिं खास यानाः ल्याय्म्हपिं शरणार्थीत थौंकन्हय् अमेरिका वनेगु भ्वं आदि दयेकाः तयारीया ज्याय् ब्वाँय् जुयाच्वंगु यक्वं खंकेफु ।
