सहमति मयाःसा कर मपुलीगु
येँ (सन्ध्या टाइम्स)/माओवादी आन्दोलन दिकेगु लागिं सतकय् शान्ति र्याली पिकाःपिं उद्योगपति ब्यापारीतय्सं आः कन्हय् शनिवाः बहनी तकया दुने स्वंगू दल मिले जुयाः राष्ट्रिय सहमतिया सरकार गठन मयात धाःसा थःपिंसं सरकारयात कर मपुलेगु ख्याच्वः बिउगु दु। म्हिगः च्वंगु नेउवा संघया आपतकालीन बैठकं स्वंगू तःधंगु दलतय्त ४८ घण्टाया अल्टिमेटम बिसें यदि अबलय् तकया दुने नं दलतय्सं सहमति मयात धाःसा थःपिंसं सरकारयात कर व पार्टीतय्त चन्दा बीगु बन्द यायेगु जुइ धकाः ख्याच्वः बिउगु खः ।
शान्तिया लागिं कुतः याःपिं उद्यमि व्यापारीतय्त माओवादी व सरकार निगुलिं पक्षं ब्वः बिउगु खँयात कयाः नं व्यापारीतय्सं विरोध प्वंकूगु दु। थ्व बारे न्ववासें नेउवा संघया अध्यक्ष कुशकुमार जोशीं म्हिगः धयादिल, 'झीगु हे ध्यबां लहिना तयापिं थ्व राजनीतिक दलतय्सं थौं वयाः झीत हे ब्वः बीगु ला?'
वय्कलं पार्टीतय्सं सहमति मयाःत धाःसा देय्न्यंकंया व्यापारीत येँया सतकय् हयाः प्रदर्शन यायेगु ख्याच्वः नं बियादिल।
