थौं नेवाः संघर्षया ज्याझ्वः घोषणा
येँ (सन्ध्या टाइम्स)/न्हूगु संविधानया सुनिश्चितता व उकी नेवाः स्वायत्त राज्यया ग्यारेन्टी जुइमाः धइगु माग यासें नेवाः स्वायत्त राज्य मंकाः संघर्ष समितिं याकनं हे यायेत्यंगु आन्दोलनया तयारी कथं थौं नेवाः कार्यकर्तातय् छगू भेला सःतूगु दु। येँया चेम्बर भवनय् जुइगु उगु भेलाय् नेवाःतय्सं न्हूगु संविधानया लागिं हानं संघर्ष यायेमाःगु खँ ध्वाथुइकुसें आः थःपिंसं यायेगु संघर्ष ज्याझ्वः नं न्ह्यब्वइगु खँ धाःगु दु ।
संघर्षया गज्याःगु ज्याझ्वः वइ धइगु खँ सी मदुनिसां जेठ १४ गते संविधान जारी यायेगु धकाः न्हि तोके यानातः कुन्हु हे राजधानी येँय् छगू तःधंगु र्याली पिकायेगु ज्या जुइफु धाःगु दु ।
थ्व बाहेक सरकार व राजनीतिक पार्टीतय्त दवाव जुइ कथंया थीथी ज्याझ्वःत वयेफुगु खँ नं धाःगु दु ।
