व्यवसायीतय्सं कर मपुलेगु धयाः द्वंकल : ओली
नेकपा (एमाले)या वरिष्ठ नेता केपी शर्मा ओलीं उद्योगी व्यवसायीतय्सं सरकारयात कर मपुले धयाः द्वंकूगु खँ धयादीगु दु । बिहीवाः नेपाल उद्योग वाणिज्य महासंघं निन्हुया दुने राजनीतिक दलत दगुइ सहमति मजुसाः राजनीतिक दलयात चन्दा मबीगु व सरकारयात कर मपुलेगु ख्याच्वः ब्यूगु खः ।
रक्त संचार क्लबं शुक्रवाः ख्वपय् याःगु ज्याझ्वलय् व्यवापारीत प्रति आक्रोश प्वंकादिसें नेता ओलीं दलतय्त सहमतिलय् वयेत महासंघं निन्हुया अल्टिमेट बिया द्वंकूगु धयादिसें सरकारयात कर मपूलेगु धकाः व्यापारीतय्सं मधाःगु खःसा बांलाइगु धयादिल ।
वय्कलं माओवादीं बलजफ्ती विद्रोह, कब्जा, आक्रमण, हिंसा त्वःताः झिंनिगू बुँदे सहमति पालना यानाः संविधान च्वयेगु व शान्ति प्रकृयाय् वसाः जक विश्वास यायेफइगु धयादिल । वय्कलं माओवादी आन्दोलन जनतायात दुःख बिया, धम्की बिया, आक्रमण यानाः सत्ता प्राप्तिया निंतिं जूगुलिं जनतां माओवादीयात परास्त याइगु दाबी यानादिल ।
उगु हे ज्याझ्वलय् राष्ट्रिय जनमोर्चाया अध्यक्ष चित्रबहादुर केसीं इलय् संविधान जारी यायेमफइगुया दोषी माओवादी जूगु धयादिसें माओवादीं सरकारया कारणं इलय् संविधान जारी यायेमफुगु धकाः द्वपं बीमज्यूगु धयादिल ।
