'संविधानसभाया म्याद दच्छि थपे या'
नेकपा (एमाले)या सभासद्तय्सं संविधानसभाया म्याद दच्छि थप यायेमाःगु सुझाव पार्टी नेतृत्वयात ब्यूगु दु ।
शुक्रवाः सुथय् च्वंगु एमाले संसदीय दलया बैठकय् न्ववापिं अधिकांश सभासद्तय्सं संविधानसभाया म्याद दच्छि थपे यायेगु प्रक्रिया न्ह्याकेत इनाप याःगु खः । उगु इलय् सभासद्तय्सं राज्य पुनर्संरचना आयोग पाखें राज्य पुनर्संरचनाया खाका तयार यायेमाःगु व राज्य पुनर्संरचना मजुतल्ले संविधान जारी जुइमफइगु धासें दच्छिया निंतिं म्याद थप यायेमाःगु बिचाः प्वंकूगु खः ।
सभासद्तय्सं पटक पटक ई तनेगु स्वयां छक्वलं दच्छिया निंतिं ई तनेमाःगु खँ धाःगु खःसा छुंछुं सभासद्तय्सं धाःसा खुल्लाया निंतिं जक म्याद तनेत सुझाव ब्यूगु खः । अथेहे सभासद्तय्सं दक्वं राजनीतिक दलत दथुइ सहमति कायम यानाः जक संविधानसभाया ई तनेत अन्तरिम संविधान संशोधन यायेमाःगु बिचाः प्वंकूगु खः ।
बैठकय् पार्टी अध्यक्ष झलनाथ खनालं संविधानसभाया म्याद तनेगु बारे तयादीगु प्रस्तावय् अधिकांश सभासद्तय्सं सहमित प्वंकूगु खः । वय्कलं संविधान निर्माण, शान्ति प्रकृया लगायतया बारे मौखिक प्रतिवेदन न्ह्यब्वयादीगु खः ।
