थ्वहे सरकारं सेना समायोजन : सुजाता

उपप्रधान नाप परराष्ट्रमन्त्री सुजाता कोइरालां माओवादी लडाकुया समायोजन थ्वहे सरकारं यानाः जक बिदा काइगु खँ धयादीगु दु ।

शुक्रवाः बाराय् जूगु छगू ज्याझ्वलय् न्ववानादिसें वय्कलं माओवादीया ल्वाभः व्यवस्थापना, सेना समायोजन व वाइसीएलया अर्धसैन्य संरचना भंग मयायेकं न्हूगु सरकार गठन जुइमपइगु धयादिसें थ्व दक्वं ज्याखँ पूवनेधुंकाः जक माओवादी नाप सहमति जुइफइगु धयादिल ।

वय्कलं माओवादी कार्यकर्तातय्सं आः नं ल्वाभः ज्वना सतकय् वयाच्वंगु द्वपं बियादिसें ल्वाभःया भरय् माओवादीं हत्या हिंसा जारी तःगु धयादिल । माओवादीं न्ववाइगु छगू व याइगु मेगू हे जूगुलिं उमित विश्वास यायेमफइगु धयादिसें माओवादीं न्ववाइगु खँ व्यवहारय् यानाः क्यनेमाःगु धयादिल ।