अनमिन प्रमुख करिन लेनग्रेनपाखें पत्रकार सम्मेलन
संयुक्त राष्ट्रसंघीय राजनीतिक मिसन अनमिन प्रमुख करिन लेनग्रेनं दल दथुइ तुरुन्त सहमति मजुल धाःसा प्यलाया दुने लडाकु समायोजन व पुनःस्थापना यायेमफइगु धयादीगु दु ।
सुरक्षा परिषद्या मुँज्याय् ब्वति कयाः म्हिगः जक नेपाः लिहाँझाम्ह अनमिन प्रमुख लेनग्रेनं थौं येँय् पत्रकार सम्मेलन याना गतिरोध अन्त्यया निंतिं तुरुन्त सहमति व सहकार्य यायेत दलयात इनाप यानादीगु दु । नेपाःया शान्ति प्रकि्रया हाथ्यापूर्ण जूगु धयादिसें वय्कलं माओवादी लडाकुया रेखदेख समायोजन नापं पुनःस्थापनाया निंतिं गठित विशेष समिति व प्राविधिक समतिया ग्वाहालिइ धलः दयेकेत छ्याता बियादिल । वय्कलं शान्ति प्रक्रिया निष्कर्षय् मथ्यंगुलिं नेपाल सरकारं अनमिनया म्याद प्यला तनेत राष्ट्रसंघीय सुरक्षा परिषद्यात छ्वःगु पौया लिधंसाय् सुरक्षा परिषदं अनमिनया म्याद प्यला तनागु जानकारी नं ब्यूगु खः । लडाकु समायोजनबारे दल दथुइ सहमति कायम जुइमफयेवं अनमिनया म्याद पटक-पटक तनेमाःगु धयादिसें लनग्रेनं नेपालय् च्वनाच्वनेगु अनमिनया चाहना मदुगु नं स्पष्ट यानादिल ।
पत्रकार सम्मेलनय् लेनग्रेनं थौं हे सुथय् माओवादी नायः पुष्पकमल दाहालनाप नापलाना लडाकु समायोजन व पुनःस्थापनय् जिम्मेवार जुइत इनाप यानागु जानकारी नं बियादिल । वय्कलं नापलायेगु झ्वलय् माओवादी नायः दाहालं माओवादी हाकनं द्वन्द्वय् मवनीगु धयादीगु जानकारी नं बियादिल । पत्रकार सम्मेलनय् अनमिमन प्रमुख लनग्रेनं माओवादीं आमहडताल लितकाःसां नं राजनीतिक सहमति कःघायेमफूगु धयादिसें शान्ति प्रक्रिया व संविधान च्वयेगु ज्याय् जिम्मेवार जुइत सरकार व दलयात इनाप यानादिल ।
